قد کا تعلق صرف ظاہری شخصیت سے نہیں، بعض تحقیقات کے مطابق یہ صحت اور عمر کے دورانیے پر بھی اثر انداز ہو سکتا ہے۔ ماہرین کے مطابق کم قد ہونا لمبی عمر کی ضمانت نہیں، تاہم نسبتاً چھوٹے قد والے افراد میں کچھ بیماریوں کا خطرہ کم ہو سکتا ہے۔
تحقیقات میں بتایا گیا ہے کہ لمبے قد والے افراد میں خون کے لوتھڑے بننے کا امکان نسبتاً زیادہ ہو سکتا ہے۔ اس کی ایک وجہ یہ ہو سکتی ہے کہ لمبی ٹانگوں میں رگیں زیادہ طویل ہوتی ہیں، جس سے خون کی روانی سست پڑ سکتی ہے۔ تاہم سکتی ہے۔ تاہم عمر، موٹاپا، خاندانی بیماریوں کی تاریخ اور بعض علاج بھی اس خطرے کو بڑھا سکتے ہیں۔
دوسری وجہ دل کی بے ترتیب دھڑکن سے متعلق ہے۔ بعض ماہرین کے مطابق لمبے اور بڑے جسمانی ڈھانچے والے افراد میں دل کے خانوں کا حجم زیادہ ہو سکتا ہے، جس سے دل کی دھڑکن متاثر ہونے کا امکان بڑھ جاتا ہے۔
تیسری وجہ سرطان کے خطرے سے جڑی ہے۔ کچھ مطالعات میں زیادہ قد کو سرطان کی بعض اقسام کے نسبتاً زیادہ خطرے سے جوڑا گیا ہے، مگر ماہرین کہتے ہیں کہ اس میں غذا، وزن، ماحول، تمباکو نوشی اور خاندانی عوامل بھی اہم کردار ادا کرتے ہیں۔
جینیاتی عوامل بھی عمر کے دورانیے پر اثر ڈالتے ہیں۔ بعض تحقیقات میں ایک خاص جینیاتی عنصر کو کم جسمانی ساخت، بہتر شوگر کنٹرول اور نسبتاً لمبی عمر سے جوڑا گیا ہے۔
تاہم ماہرین کے مطابق لمبی اور صحت مند زندگی کا اصل دارومدار صرف قد پر نہیں بلکہ اچھی غذا، روزانہ جسمانی سرگرمی، مناسب نیند، تمباکو نوشی سے پرہیز، ذہنی سکون اور باقاعدہ طبی معائنے پر ہے۔
