بھارت کے شہر ممبئی میں ایک لاکھ شائقین کی گنجائش والا نیا کرکٹ اسٹیڈیم بنانے کا منصوبہ سامنے آ گیا ہے۔ ممبئی کرکٹ ایسوسی ایشن نے جمعرات کو اعلان کیا ہے کہ اس بڑے منصوبے کے لیے زمین کے حصول کا عمل شروع کر دیا گیا ہے۔ حکام کے مطابق، اس منصوبے کا ہدف ایک عالمی معیار کا اسٹیڈیم تعمیر کرنا ہے جس میں جدید سہولیات فراہم کی جائیں گی۔
دی نیشن کے مطابق، فی الحال شہر میں تین بڑے کرکٹ میدان موجود ہیں، جن میں سب سے مشہور وانکھیڈے اسٹیڈیم ہے، تاہم اس کی گنجائش محدود ہونے کے باعث بڑے مقابلوں کے انعقاد میں مشکلات پیش آتی ہیں۔ اس اسٹیڈیم میں تقریبا 33 ہزار تماشائیوں کی گنجائش ہے، جس کے باعث بڑے عالمی فائنلز عموما دیگر شہروں میں منتقل کر دیے جاتے ہیں۔
اسی وجہ سے بھارت کے شہر احمد آباد میں واقع نریندر مودی اسٹیڈیم، جو دنیا کا سب سے بڑا کرکٹ اسٹیڈیم ہے، اہم مقابلوں کی میزبانی کرتا ہے۔نئے مجوزہ اسٹیڈیم کے ذریعے ممبئی کو بھی بڑے عالمی مقابلوں کی میزبانی کا موقع ملے گا اور شہر کی کرکٹ میں اہمیت مزید بڑھے گی۔
کھیلوں کے ماہرین کے مطابق، اس نوعیت کے بڑے منصوبے کو کامیاب بنانے کے لیے صرف کرکٹ پر انحصار کافی نہیں ہوتا، اس لیے ایسے اسٹیڈیمز کو دیگر تقریبات، کنسرٹس اور بڑے عوامی اجتماعات کے لیے بھی استعمال کیا جاتا ہے تاکہ اخراجات پورے کیے جا سکیں۔
