اداکار سلمان خان کی نئی فلم ماتر بھومی کے حوالے سے گردش کرنے والی افواہوں کی تردید کر دی گئی ہے۔ بعض رپورٹس میں کہا جا رہا تھا کہ یہ فلم سینما گھروں کے بجائے براہِ راست او ٹی ٹی پلیٹ فارم پر ریلیز کی جائے گی، تاہم فلم سے قریبی ذرائع نے ان خبروں کو غلط قرار دیا ہے۔
ذرائع کے مطابق سلمان خان ایک بڑے اداکار ہیں اور انہوں نے اس فلم کو بڑے پیمانے پر تیار کیا ہے، اس لیے وہ اور ہدایتکار اپوروا لاکھیا اس بات کے لیے پُرعزم ہیں کہ فلم کو سینما گھروں میں ہی پیش کیا جائے، جیسے ہی اس سے متعلق تمام مسائل حل ہو جائیں گے۔
ماہرین کا کہنا ہے کہ او ٹی ٹی پلیٹ فارمز پر ریلیز ہونے والی فلموں کو بھی سنسرشپ کے عمل سے گزرنا پڑتا ہے، اس لیے براہِ راست ڈیجیٹل ریلیز بھی حکومتی منظوری کے بغیر ممکن نہیں۔
واضح رہے کہ اس فلم کا ابتدائی نام بیٹل آف گلوان تھا اور یہ 2020 میں ہونے والے گلوان ویلی تنازع سے متاثر تھی، تاہم اب فلم میں بڑی تبدیلیاں کی گئی ہیں جن میں چین اور گلوان ویلی کے حوالوں کو نکالنا اور دوبارہ شوٹنگ شامل ہے۔
فلم میں سلمان خان بھارتی فوج کے ایک کرنل کے کردار میں نظر آئیں گے جبکہ ان کے ساتھ اداکارہ چترانگدا سنگھ بھی شامل ہیں۔ فلم کی ریلیز کی تاریخ کا ابھی تک اعلان نہیں کیا گیا
