محکمہ داخلہ پنجاب نے صوبے بھر میں امن و امان کی صورتحال کے پیش نظر دفعہ 144 کے نفاذ میں 7 دن کی توسیع کر دی ہے۔ نئی پابندیاں جمعہ، 24 اکتوبر تک نافذ رہیں گی۔
سرکاری اعلامیے کے مطابق اس دوران پنجاب بھر میں ہر قسم کے جلسے، جلوس، ریلیاں، دھرنے، مظاہرے، اجتماعات اور عوامی سرگرمیوں پر مکمل پابندی عائد رہے گی۔ دفعہ 144 کے تحت چار یا زائد افراد کے عوامی مقامات پر اکٹھا ہونے پر بھی مکمل پابندی ہوگی۔
محکمہ داخلہ کے ترجمان کے مطابق، صوبے میں اسلحہ کی نمائش اور لاؤڈ اسپیکر کے استعمال پر بھی پابندی برقرار رکھی گئی ہے۔ تاہم، لاؤڈ اسپیکر صرف اذان اور جمعے کے خطبے کے لیے استعمال کیے جا سکیں گے۔
اشتعال انگیز، نفرت انگیز یا فرقہ وارانہ مواد کی اشاعت اور تقسیم پر مکمل پابندی ہوگی۔ حکومت پنجاب کا کہنا ہے کہ یہ فیصلہ دہشت گردی کے ممکنہ خطرات اور امن عامہ کے خدشات کے پیش نظر کیا گیا ہے۔
محکمہ داخلہ کے مطابق، عوامی جلوس اور دھرنے دہشت گردوں کے لیے آسان ہدف بن سکتے ہیں، جبکہ شرپسند عناصر ایسے اجتماعات کا فائدہ اٹھا کر ریاست مخالف سرگرمیاں کر سکتے ہیں۔
پابندی کا اطلاق شادی کی تقریبات، جنازوں اور تدفین پر نہیں ہوگا، جبکہ سرکاری فرائض انجام دینے والے اہلکار اور عدالتیں بھی اس حکم سے مستثنیٰ ہوں گی۔
دفعہ 144 کے نفاذ کی عوامی آگاہی کے لیے بڑے پیمانے پر تشہیر کی ہدایت بھی جاری کر دی گئی ہے۔ یہ سفارش کابینہ کمیٹی برائے امن و امان کے 38ویں اجلاس میں دی گئی تھی، جسے حکومت پنجاب نے منظور کرتے ہوئے نوٹیفکیشن جاری کر دیا ہے۔
