فیفا ورلڈ کپ 2026 میں پیراگوئے نے بڑا اپ سیٹ کرتے ہوئے چار بار کی عالمی چیمپئن جرمنی کو پنالٹی شوٹ آؤٹ پر شکست دے کر راؤنڈ آف 16 میں جگہ بنا لی۔
لاسٹ 32 کے میچ میں مقررہ اور اضافی وقت کے بعد مقابلہ 1-1 سے برابر رہا، جس کے بعد پیراگوئے نے پنالٹی شوٹ آؤٹ میں جرمنی کو 3-4 سے شکست دی۔
پیراگوئے کی جانب سے خولیو اینسیسو نے پہلے ہاف میں گول کر کے ٹیم کو برتری دلائی، تاہم جرمنی کے کائی ہاورٹز نے گول کر کے مقابلہ برابر کر دیا۔
میچ کے اختتامی مرحلے میں جرمنی کا ایک گول مسترد ہوا، جبکہ پنالٹی شوٹ آؤٹ میں پیراگوئے کے گول کیپر اورلینڈو گل نے دو اہم سیوز کر کے اپنی ٹیم کو تاریخی کامیابی دلائی۔
پیراگوئے کے کوچ گستاوو الفارو نے اپنی ٹیم کی کارکردگی کو “غیر معمولی” قرار دیتے ہوئے کہا کہ کھلاڑیوں نے پورے میچ میں زبردست محنت کی اور جرمنی کو اپنا کھیل کھیلنے کا موقع نہیں دیا۔
ان کے مطابق میچ انتہائی دباؤ والا تھا، کیونکہ سامنے ایک ایسی ٹیم تھی جسے ٹورنامنٹ کی مضبوط امیدواروں میں شمار کیا جا رہا تھا۔
کوچ نے کہا کہ گرم موسم اور مسلسل دفاعی محنت کے باعث ان کی ٹیم کو حملے کے لیے کم توانائی ملی، لیکن کھلاڑیوں نے منصوبہ بندی پر مکمل عمل کیا۔
جرمنی اس سے پہلے ورلڈ کپ میں کبھی پنالٹی شوٹ آؤٹ نہیں ہارا تھا، مگر اس بار پیراگوئے نے ان کے خلاف تاریخی کامیابی حاصل کی۔
الفارو نے کہا کہ شاید پیراگوئے کی فٹبال کا انداز ہی ایسا ہے کہ کامیابی بھی تکلیف اور دباؤ کے بعد آتی ہے۔ انہوں نے یہ فتح تمام پیراگوئے کے عوام کے نام کی۔
پیراگوئے نے ورلڈ کپ ناک آؤٹ مرحلے میں صرف دوسری بار کامیابی حاصل کی ہے۔ اگلے مرحلے میں اس کا مقابلہ ممکنہ طور پر فرانس سے ہو سکتا ہے، اگر فرانس سویڈن کو شکست دے دے۔
میچ کے ہیرو خولیو اینسیسو نے کہا کہ جرمنی کے کھلاڑی بہت معیاری ہیں، لیکن پیراگوئے کسی سے خوفزدہ نہیں۔ ان کے مطابق ٹیم اپنے انداز میں ہر مخالف کے لیے مشکلات پیدا کرنے کی کوشش کرے گی۔
اس تاریخی فتح کے بعد پیراگوئے میں قومی تعطیل کا اعلان کر دیا گیا، جبکہ ملک بھر اور بوسٹن اسٹیڈیم کے باہر شائقین نے بھرپور جشن منایا۔
