لبنان میں جاری کشیدگی کے تناظر میں ایران کے سپریم لیڈر مجتبیٰ خامنہ ای نے بڑی طاقتوں پر بھروسا کرنے والوں کو خبردار کرتے ہوئے کہا ہے کہ بالادست قوتوں کے وعدوں سے وابستہ امیدیں بالآخر مایوسی اور ذلت کا سبب بنتی ہیں۔
مجتبیٰ خامنہ ای نے سماجی رابطے کی ویب سائٹ ایکس پر مختصر بیان میں لبنان کی موجودہ صورتحال کا حوالہ دیتے ہوئے کہا کہ حالیہ حالات نے ان افراد کے مؤقف کو بے نقاب کردیا ہے جو طاقتور ممالک کے وعدوں کو اپنی امید کا سہارا بناتے ہیں۔
ایرانی سپریم لیڈر نے اپنے بیان میں کسی ملک یا حکومت کا نام نہیں لیا، تاہم یہ بیان ایسے وقت سامنے آیا ہے جب لبنان خطے میں جاری وسیع تر کشیدگی کی لپیٹ میں ہے اور حزب اللہ اور اسرائیلی افواج کے درمیان تنازع برقرار ہے۔
لبنان کی صورتحال کو ایران، امریکا اور اسرائیل کے درمیان جاری علاقائی کشیدگی سے بھی جوڑا جا رہا ہے۔ تہران ماضی میں حزب اللہ کی حمایت کو اپنی علاقائی حکمت عملی کا اہم حصہ قرار دیتا رہا ہے، جبکہ لبنان میں اسرائیلی کارروائیوں کا معاملہ بھی ایران کے مؤقف میں اہم حیثیت رکھتا ہے۔
مجتبیٰ خامنہ ای کا تازہ بیان ایسے وقت سامنے آیا ہے جب امریکا اور ایران کے درمیان کشیدگی کم کرنے اور جنگ بندی کے لیے سفارتی رابطے جاری ہیں۔ قطر سمیت بعض ممالک دونوں فریقوں کے درمیان ثالثی کی کوششیں کر رہے ہیں، تاہم اہم معاملات پر اختلافات تاحال برقرار ہیں۔
ایرانی سپریم لیڈر اس سے قبل بھی آبنائے ہرمز اور خطے میں جاری فوجی کشیدگی کے حوالے سے سخت مؤقف کا اظہار کر چکے ہیں۔ لبنان سے متعلق ان کا حالیہ بیان بھی اسی وسیع تر علاقائی تناظر میں سامنے آیا ہے، جہاں مختلف محاذوں پر کشیدگی نے سفارتی کوششوں کو مزید پیچیدہ بنا دیا ہے۔
