ورلڈکپ 2026 میں کئی فٹبالرز نے صرف میدان میں ہی نہیں بلکہ سوشل میڈیا پر بھی غیر معمولی مقبولیت حاصل کی۔ کھلاڑیوں کی شاندار کارکردگی، دلچسپ شخصیت، ذاتی کہانیاں اور شائقین سے براہِ راست رابطہ انہیں راتوں رات سوشل میڈیا اسٹار بنانے کا سبب بن گیا۔
رونالڈو، میسی اور نیمار جیسے بڑے ناموں کے فالوورز میں بھی اضافہ ہوا، مگر اس ورلڈکپ میں کچھ ایسے کھلاڑی بھی نمایاں ہوئے جن کی مقبولیت اچانک کئی گنا بڑھ گئی۔
ایرلنگ ہالینڈ، ناروے
ناروے کے اسٹرائیکر ایرلنگ ہالینڈ ورلڈکپ کے دوران میدان اور سوشل میڈیا دونوں جگہ سب سے زیادہ پسند کیے جانے والے کھلاڑیوں میں شامل رہے۔25 سالہ ہالینڈ کی مزاحیہ، بے ساختہ اور عام لوگوں جیسی پوسٹنگ نے انہیں شائقین کے مزید قریب کر دیا۔
وہ کبھی ڈریسنگ روم سے جیت کے فوراً بعد پوسٹ کرتے نظر آئے، کبھی اسنیپ چیٹ پر بے ساختہ لمحات شیئر کیے، اور کبھی جہاز میں ایک عجیب و غریب ریکون کے ساتھ وائرل ہوئے۔ ہالینڈ کے انسٹاگرام فالوورز 7 کروڑ سے زیادہ ہیں، جن میں سے 2 کروڑ 90 لاکھ فالوورز صرف گزشتہ 30 دنوں میں بڑھے۔
ووزینہ، کیپ ورڈی
کیپ ورڈی کے 40 سالہ گول کیپر ووزینہ اس ورلڈکپ کی سب سے خوبصورت کہانیوں میں سے ایک بن گئے۔ انہوں نے دنیا کی مضبوط ٹیموں کے خلاف شاندار سیوز کیے اور اپنی ٹیم کو کئی مواقع پر شکست سے بچایا۔
اسپین کے خلاف کیپ ورڈی کے پہلے میچ میں ووزینہ نے شاندار کارکردگی دکھائی، جس کے بعد ان کے انسٹاگرام فالوورز چند گھنٹوں میں 5 لاکھ سے بڑھ کر تقریباً 50 لاکھ ہو گئے۔ اس وقت ان کے انسٹاگرام فالوورز 2 کروڑ 93 لاکھ تک پہنچ چکے ہیں۔
ووزینہ کی کہانی اس لیے بھی دل چھو لینے والی رہی کہ ان کی والدہ آخرکار امریکی ویزا ملنے کے بعد ورلڈکپ میچ دیکھنے پہنچیں۔ ووزینہ نے مذاق میں کہا کہ ورلڈکپ سے پہلے بہت سے لوگ کیپ ورڈی کو نقشے پر بھی نہیں ڈھونڈ سکتے تھے، مگر اب دنیا اس ملک کو جانتی ہے۔
جوڈ بیلنگھم، انگلینڈ
انگلینڈ کے مڈفیلڈر جوڈ بیلنگھم پہلے ہی دنیا کے مقبول ترین نوجوان فٹبالرز میں شامل تھے، مگر ورلڈکپ 2026 نے ان کی مقبولیت کو مزید بڑھا دیا۔ 23 سالہ بیلنگھم گولڈن بوٹ کی دوڑ میں بھی نمایاں رہے اور انگلینڈ کو ورلڈکپ کے اہم مراحل تک پہنچانے میں اہم کردار ادا کیا۔
اگرچہ انگلینڈ کا سفر سیمی فائنل میں ختم ہو گیا، مگر بیلنگھم کی شخصیت اور کارکردگی نے شائقین کے دل جیت لیے۔ بیلنگھم کے انسٹاگرام فالوورز تقریباً 5 کروڑ ہیں۔
ان کی مقبولیت میں اس وقت بھی اضافہ ہوا جب انہوں نے ذہنی صحت سے متعلق اپنی جدوجہد کے بارے میں کھل کر بات کی۔
لامین یامال، اسپین
اسپین کے نوجوان اسٹار لامین یامال ورلڈکپ 2026 میں ایک بار پھر عالمی توجہ کا مرکز بنے۔ 19 سالہ یامال پہلے ہی یورو 2024 کے بعد شہرت حاصل کر چکے تھے، مگر اس ورلڈکپ نے انہیں سوشل میڈیا پر مزید بڑا نام بنا دیا۔
ان کا انسٹاگرام اکاؤنٹ میچ کے بعد کی تصاویر، برانڈ شراکت داری، ٹرافیز اور خاندان کے ساتھ لمحات سے بھرا ہوا ہے۔
یامال کے چھوٹے بھائی کینے بھی ورلڈکپ کے دوران شائقین کی توجہ کا مرکز بن گئے، خاص طور پر اس وقت جب وہ اسٹیڈیم میں یامال کے ساتھ نظر آئے۔ یامال کے انسٹاگرام فالوورز 4 کروڑ 96 لاکھ تک پہنچ چکے ہیں۔
سوشل میڈیا پر میسی اور یامال کی 2007 کی وہ تصویر بھی دوبارہ وائرل ہوئی، جس میں میسی نے ننھے یامال کو گود میں اٹھایا ہوا تھا۔ اب اسپین ورلڈکپ فائنل میں میسی کی ارجنٹینا کا مقابلہ کرے گا، جس سے یامال کی کہانی مزید دلچسپ ہو گئی ہے۔
ٹم پین، نیوزی لینڈ
نیوزی لینڈ کے ڈیفنڈر ٹم پین کی مقبولیت ورلڈکپ شروع ہونے سے پہلے ہی وائرل مہم کے ذریعے بڑھ گئی تھی۔ ارجنٹینا کے ایک انفلوئنسر ویلین اسکارسینی نے انہیں ورلڈکپ کا سب سے کم معروف کھلاڑی قرار دے کر اپنے فالوورز سے اپیل کی کہ وہ ٹم پین کو فالو کریں۔اس مہم کے بعد ٹم پین کے انسٹاگرام فالوورز 5 ہزار سے کم تعداد سے بڑھ کر تقریباً 58 لاکھ تک پہنچ گئے۔
32 سالہ ٹم پین نے بعد میں ایک ویڈیو میں شائقین کی محبت کا شکریہ ادا کیا۔ وہ ورلڈکپ سے پہلے فلوریڈا میں اپنی ٹیم کے ہوٹل میں اس انفلوئنسر سے بھی ملے، جس نے انہیں اچانک عالمی توجہ دلا دی۔
