افغانستان نے پاکستان پر صوبہ پکتیکا میں حملے کے دوران افغان کرکٹرز کی ہلاکت کا الزام عائد کرتے ہوئے آئندہ ماہ پاکستان میں شیڈول سہ فریقی ٹی ٹوئنٹی سیریز سے دستبرداری اختیار کر لی ہے۔
افغان کرکٹ بورڈ نے اپنے بیان میں کہا ہے کہ افغان کرکٹ بورڈ صوبہ پکتیکا کے ضلع ارغون سے تعلق رکھنے والے بہادر کرکٹرز کی المناک ہلاکت پر گہرے رنج و غم کا اظہار کرتا ہے، جنہیں آج شام پاکستانی حملے میں نشانہ بنایا گیا۔
تاہم پاکستان کی حکومت اور فوج کی جانب سے اس حوالے سے کوئی بیان سامنے نہیں آیا۔
افغان کرکٹ بورڈ کا کہنا ہے کہ واقعے میں ارغون سے تعلق رکھنے والے تین کرکٹرز ، کبیر، صبغت اللہ اور ہارون سمیت پانچ افراد جاں بحق اور سات زخمی ہوئے۔ بتایا گیا ہے کہ یہ کھلاڑی ایک دوستانہ میچ میں شرکت کے بعد ارغون واپس آئے تھے اور ایک اجتماع کے دوران حملے کا نشانہ بنے۔
افغانستان کو نومبر میں پاکستان میں سہ فریقی ٹی ٹوئنٹی سیریز کھیلنی تھی، جس میں میزبان پاکستان کے ساتھ سری لنکا کی ٹیم بھی شریک ہونی تھی۔
افغان کرکٹ ٹیم کے کپتان راشد خان، سابق کپتان محمد نبی اور دیگر کھلاڑیوں نے بھی اس حملے کی شدید مذمت کرتے ہوئے ہلاک شدگان کے اہل خانہ سے اظہارِ تعزیت کیا ہے۔
