آسٹریلیا کے شہر سڈنی میں مونوپلی کھیلنے والوں نے ایک نیا عالمی ریکارڈ قائم کر دیا ہے، جہاں 918 افراد نے بیک وقت یہ مشہور بورڈ گیم کھیل کر گنیز ورلڈ ریکارڈ میں اپنا نام درج کروایا۔ اس شاندار موقع کا اہتمام لٹل لیگز فاؤنڈیشن کی جانب سے کیا گیا، جس کا مقصد نہ صرف تفریح فراہم کرنا تھا بلکہ ایک بڑے انسانی مسئلے پر آگاہی بھی پیدا کرنا تھا۔
یہ منفرد ایونٹ سڈنی میں 150 میزوں پر ترتیب دیا گیا، جہاں ہر عمر کے افراد نے ایک ساتھ بیٹھ کر مونوپلی گیم کا لطف اٹھایا۔ اس یادگار موقع کے پیچھے ایک دل کو چھو لینے والی کہانی بھی ہے۔ ایونٹ کی منتظمین سوئے ایلن اور مارینو وسیلیو نے اس ریکارڈ ساز کھیل کا انعقاد اپنی بیٹی الیگرا کی یاد میں کیا، جو 2017 میں صرف چھ سال کی عمر میں دماغ کے کینسر کا شکار ہو کر دنیا سے رخصت ہو گئی تھی۔
سوئے ایلن نے اس موقع پر گنیز ورلڈ ریکارڈز سے گفتگو کرتے ہوئے کہا کہ “ہم چاہتے تھے کہ ایک ایسی جگہ ہو جہاں جوان اور بوڑھے سب اکٹھے ہو سکیں، خوشیاں بانٹیں، اور ایسا کام کریں جس پر سب کو فخر ہو۔ یہ سب کچھ اس بیماری کے بارے میں شعور اجاگر کرنے کے لیے تھا جس نے ہماری بیٹی کی جان لے لی۔”
یہ لٹل لیگز فاؤنڈیشن کی جانب سے منعقد کی جانے والی اس نوعیت کی دوسری بڑی کوشش تھی، جس نے 733 افراد کے پرانے ریکارڈ کو توڑ کر 918 افراد کے ساتھ نیا سنگِ میل قائم کیا۔ اس کامیابی نے نہ صرف ریکارڈ بک میں جگہ بنائی بلکہ کینسر سے متعلق بیداری کو اجاگر کر کے ایک نیک مقصد کو بھی فروغ دیا۔
