بھارتی فلم انڈسٹری کے سینئر اور معتبر پروڈیوسر سلیم اختر 82 برس کی عمر میں انتقال کر گئے۔ ان کا انتقال 8 اپریل کو ممبئی کے ایک اسپتال میں ہوا، جب کہ ان کی نمازِ جنازہ 9 اپریل کو ادا کی گئی، جس میں فلمی دنیا کی کئی معروف شخصیات نے شرکت کی۔
سلیم اختر کو بالی وڈ میں نئے چہروں کو متعارف کرانے اور ان کے کیریئر کو مضبوط بنیاد فراہم کرنے کے حوالے سے خاص مقام حاصل تھا۔ انہوں نے 1997 میں رانی مکھرجی کو فلم راجا کی آئے گی بارات کے ذریعے ہندی سینما میں لانچ کیا، جو اداکارہ کی پہلی بالی وڈ فلم تھی۔ بعد ازاں 2005 میں انہوں نے تمنا بھاٹیا کو فلم چاند سا روشن چہرہ کے ذریعے فلمی دنیا میں قدم رکھنے کا موقع دیا۔ دونوں اداکارائیں بعد میں انڈسٹری کی مقبول چہروں میں شمار ہوئیں۔
سلیم اختر کی آخری رسومات میں اداکار راج ببر، رضا مراد اور شہباز خان سمیت کئی قریبی دوست اور ساتھی شریک ہوئے، جنہوں نے ان کے فلمی خدمات کو خراجِ عقیدت پیش کیا۔
1980 اور 1990 کی دہائی میں سلیم اختر کی پروڈکشنز نے بالی وڈ کو کئی یادگار فلمیں دیں۔ ان کی معروف فلموں میں قیامت، لوہا، بٹوارہ، پھول اور انگارے، بازی اور چوروں کی برات شامل ہیں۔
سلیم اختر کے انتقال سے بھارتی فلم انڈسٹری ایک کہنہ مشق اور دور اندیش فلم ساز سے محروم ہو گئی ہے، جنہوں نے کئی نوجوان فنکاروں کو کامیابی کی راہ دکھائی۔
