فیفا نے آئندہ کلب ورلڈ کپ کے لیے ریکارڈ انعامی رقم کا اعلان کر دیا، جس کے مطابق امریکا میں ہونے والے پہلے 32 ٹیموں کے ورلڈ کپ کے فاتح کو 125 ملین ڈالر کی خطیر رقم دی جائے گی۔ مجموعی طور پر اس ٹورنامنٹ کے لیے ایک ارب ڈالر کے انعامی فنڈ کی تفصیلات جاری کر دی گئی ہیں۔
فیفا کے مطابق، 14 جون سے 13 جولائی تک جاری رہنے والے اس ٹورنامنٹ میں شریک ٹیموں کے لیے 525 ملین ڈالر کی ضمانتی فیس رکھی گئی ہے۔ اس میں سب سے زیادہ 38.19 ملین ڈالر ممکنہ طور پر ریال میڈرڈ کو دیے جائیں گے، جبکہ اوشیانا کی نمائندہ ٹیم آکلینڈ سٹی کو 3.58 ملین ڈالر ملیں گے۔
ٹورنامنٹ میں گروپ اسٹیج کے ہر جیتے گئے میچ پر 2 ملین ڈالر، راؤنڈ آف 16 میں پہنچنے پر 7.5 ملین ڈالر، اور نیویارک کے قریب MetLife اسٹیڈیم میں ہونے والے فائنل کی فاتح ٹیم کو 40 ملین ڈالر کا انعام دیا جائے گا۔
گولڈن ٹرافی اس ماہ وائٹ ہاؤس میں فیفا کے صدر گیانی انفینٹینو نے امریکی صدر ڈونلڈ ٹرمپ کے حوالے کی، جس سے اس ٹورنامنٹ کی اہمیت مزید بڑھ گئی ہے۔
