رنگوں اور خوشیوں کے تہوار ہولی نے جنوبی ایشیا کے لاکھوں افراد کو ایک رنگین جشن میں ڈبو دیا۔ بھارت، نیپال اور دیگر جنوبی ایشیائی ممالک میں ہندو برادری نے روایتی جوش و خروش سے ہولی منائی، جس میں ہر طرف رنگوں کی بہار اور خوشیوں کا سماں تھا۔
ہولی، جو موسم بہار کی آمد اور برائی پر اچھائی کی فتح کی علامت ہے، ایک ایسا تہوار ہے جو دلوں کو جوڑتا ہے اور رنگوں کی زبان میں محبت اور بھائی چارے کا پیغام دیتا ہے۔ بھارت میں یہ تہوار قومی تعطیل کے طور پر منایا جاتا ہے، جبکہ نیپال میں یہ دو روزہ جشن ہے، جو جمعرات سے شروع ہوا۔
روایتی طور پر، ہولی ہندو دیوتا کرشنا اور ان کی ساتھی رادھا کی الوہی محبت کی یاد میں منایا جاتا ہے۔ یہ تجدید اور نئی زندگی کی علامت ہے۔ ملک بھر میں، لوگوں نے سفید لباس زیب تن کیے اور ایک دوسرے پر رنگین پاؤڈر پھینک کر خوشیاں منائیں۔ بچوں نے چھتوں اور بالکونیوں سے گزرنے والوں پر رنگین پانی کے غبارے پھینکے، جبکہ نوجوانوں کے گروہوں نے واٹر گنز سے سڑکوں اور پارکوں میں لوگوں کا پیچھا کیا۔ ہر طرف موسیقی کی دھنوں پر نوجوانوں کا رقص اور خوشی کا سماں تھا۔
کچھ مقامات پر، لوگوں نے رنگین پاؤڈر کی بجائے گیندا، گلاب اور چمیلی کی پتیاں ایک دوسرے پر نچھاور کیں۔ تہوار سے ایک رات قبل، بھارت کے کئی حصوں میں، برائی کی تباہی اور اچھائی کی فتح کی علامت کے طور پر بڑے الاؤ روشن کیے گئے۔ خاندان آگ کے گرد جمع ہوئے، گانے گائے، رقص کیا اور ہندو دیوتاؤں سے دعائیں مانگیں۔
