افغانستان کی وزارت صحت عامہ کے نائب وزیر خوراک و ادویات مولوی حمد اللہ زاہد نے ایک حالیہ آن لائن اجلاس میں پاکستان سے اعلیٰ معیار کی درآمد شدہ ادویات اور خوراک کی اشد ضرورت پر زور دیا ہے۔
اس ورچوئل گفتگو میں پاکستان کی ڈرگ ریگولیٹری اتھارٹی (ڈریپ) اور ایسوسی ایشن آف فارماسیوٹیکل مینوفیکچررز کے عہدیدار بھی شامل تھے۔
اجلاس کے دوران، مولوی زاہد نے ڈریپ کے رجسٹریشن کے سربراہ عبید اللہ ملک اور ان کے وفد سمیت شرکاء کا شکریہ ادا کیا۔ انہوں نے اس بات پر زور دیا کہ عوام کی صحت کے تحفظ کے لیے تمام درآمد شدہ مصنوعات سخت معیار پر پورا اترنی چاہیے۔
اجلاس میں ریگولیٹری عمل کو ہموار اور تیز کرنے کے لیےایک مشترکہ ڈیجیٹل نظام کے قیام پر بھی تبادلہ خیال کیا گیا۔ اس کے علاوہ، دواسازی کے شعبے میں روزانہ کے چیلنجوں سے نمٹنے کے لیے دونوں ممالک سے نمائندے مقرر کرنے کی تجویز پیش کی گئی ۔
ڈاکٹر عبید اللہ ملک نے افغانستان کی وزارت صحت عامہ کی میزبانی پر شکریہ ادا کیا اور دونوں ممالک کے لیے بات چیت کے فوائد کو اجاگر کیا۔ انہوں نے ادویات اور خوراک کی درآمد کے معیار کو بڑھانے میں جامع تعاون کی اہمیت پر زور دیا۔
اس اجلاس میں دونوں ممالک کے درمیان ادویات اور خوراک کے معیار کو بہتر بنانے کے لیے تعاون پر اتفاق ہوا اور مستقبل میں بھی اس طرح کے اجلاس جاری رکھنے کا عزم ظاہر کیا گیا۔
