بھارتی دارالحکومت نئی دہلی میں ایک رہائشی و کمرشل عمارت میں لگنے والی شدید آگ کے نتیجے میں کم از کم 21 افراد ہلاک جبکہ متعدد زخمی ہو گئے ہیں۔ حکام کے مطابق ہلاک ہونے والوں میں غیر ملکی شہری بھی شامل ہیں جو بھارت میں علاج کے لیے آئے تھے۔
یہ واقعہ بدھ کے روز جنوبی نئی دہلی کے علاقے مالویہ نگر میں پیش آیا، جہاں ایک عمارت کی نچلی منزل پر ریسٹورنٹ جبکہ اوپر ہوٹل قائم تھا۔ یہ علاقہ گنجان آباد ہے اور یہاں طلبہ، نوجوان پیشہ ور افراد اور مریضوں کی بڑی تعداد رہائش پذیر ہوتی ہے۔
پولیس کے مطابق آگ عمارت کی بالائی منزلوں تک تیزی سے پھیل گئی جس کے باعث وہاں موجود افراد پھنس گئے۔ فائر بریگیڈ کی 8 گاڑیوں نے موقع پر پہنچ کر امدادی کارروائیاں شروع کیں اور 40 سے زائد افراد کو زندہ نکال کر قریبی اسپتالوں میں منتقل کیا گیا۔
عینی شاہدین کے مطابق کچھ افراد جان بچانے کے لیے کھڑکیوں سے لٹکتے نظر آئے اور مدد کے لیے چیختے رہے، جبکہ دھواں اور شعلے عمارت کے اندر تیزی سے پھیلتے رہے۔ مقامی افراد نے بھی ریسکیو آپریشن میں حصہ لیتے ہوئے کئی زخمیوں کو باہر نکالنے میں مدد کی۔
ابتدائی اطلاعات کے مطابق ہلاک ہونے والوں میں بعض غیر ملکی شہری بھی شامل ہیں جو بھارت میں علاج کی غرض سے آئے تھے۔ نئی دہلی کو طب کا ایک بڑا مرکز سمجھا جاتا ہے جہاں مختلف ممالک سے مریض علاج کے لیے آتے ہیں اور اکثر سستے ہوٹلوں یا کرائے کے فلیٹس میں رہائش اختیار کرتے ہیں۔
بھارتی وزیر اعظم نریندر مودی نے واقعے پر افسوس کا اظہار کرتے ہوئے متاثرہ خاندانوں سے ہمدردی کا اظہار کیا ہے۔ ان کے دفتر کے مطابق ہلاک ہونے والوں کے اہل خانہ کو مالی امداد بھی دی جائے گی۔
حکام نے واقعے کی تحقیقات شروع کر دی ہیں تاہم ابتدائی طور پر آگ لگنے کی وجہ معلوم نہیں ہو سکی۔
