امریکا کے نومنتخب صدر ڈونلڈ ٹرمپ نے اپنی نئی کابینہ کے لیے دو عرب نژاد امریکیوں کو منتخب کیا ہے، جو جنوری میں ان کے حلف اٹھانے کے بعد اپنی ذمہ داریاں سنبھالیں گے۔ ڈاکٹر جینیٹ نیشیوات کو امریکا کی سرجن جنرل کے طور پر نامزد کیا گیا ہے، جبکہ ڈاکٹر مارٹی میکیری فوڈ اینڈ ڈرگ ایڈمنسٹریشن کے سربراہ کے طور پر خدمات انجام دیں گے۔
ان تقرریوں کو عرب امریکن فار ٹرمپ گروپ کے چیئرمین ڈاکٹر بشرا باہباہ نے سراہا ہے۔ انہوں نے کہا کہ یہ اقدام عرب نژاد امریکیوں کے کردار کو تسلیم کرنے کا ثبوت ہے، جنہوں نے ٹرمپ کو امریکا کا 47واں صدر بنانے میں اہم کردار ادا کیا۔ ڈاکٹر باہباہ نے مزید کہا کہ ٹرمپ کی جانب سے عرب امریکیوں کو اعلیٰ عہدوں پر فائز کرنا ان کی حمایت کو ظاہر کرتا ہے اور امید ہے کہ مستقبل میں اس نوعیت کی مزید تقرریاں بھی دیکھنے کو ملیں گی۔
یہ پہلا موقع ہے کہ عرب نژاد امریکیوں کو ٹرمپ کی کابینہ میں شامل کیا گیا ہے، جو عرب کمیونٹی کے لیے ایک تاریخی لمحہ ہے۔ ان تقرریوں سے نہ صرف امریکا میں بسنے والی اقلیتوں کے کردار کو اجاگر کیا گیا ہے بلکہ ان کے لیے ایک مثبت اور حوصلہ افزا پیغام بھی دیا گیا ہے۔
