بھارتی فلمی صنعت میں ایک اہم پیش رفت سامنے آئی ہے جہاں سینئر اداکار سنجے دت نے غیر معمولی کامیابی حاصل کرتے ہوئے ایک منفرد اعزاز اپنے نام کر لیا ہے۔
رپورٹس کے مطابق سنجے دت ایسی چار فلموں کا حصہ بن چکے ہیں جنہوں نے دنیا بھر میں ایک ہزار کروڑ روپے سے زائد کا کاروبار کیا۔ اس طرح وہ ان اداکاروں میں نمایاں ہو گئے ہیں جن کی متعدد فلمیں اس کلب میں شامل ہیں۔
ان فلموں میں کے جی ایف چیپٹر ٹو خاص طور پر قابلِ ذکر ہے، جس میں سنجے دت نے منفی کردار ادا کیا اور فلم نے زبردست کامیابی حاصل کی۔ اس کے علاوہ فلم جوان میں ان کا مختصر کردار بھی ایک بڑی کامیاب فلم کا حصہ بنا، جس میں مرکزی کردار شاہ رخ خان نے ادا کیا تھا۔
رپورٹس کے مطابق سنجے دت نے حالیہ برسوں میں جنوبی بھارتی فلموں میں بھی کام کیا ہے، جہاں ان کے منفی کرداروں کو خوب سراہا گیا اور انہیں ایک نئی پہچان ملی۔
دوسری جانب دیگر بڑے اداکاروں میں رنویر سنگھ، پربھاس اور رنبیر کپور بھی اس فہرست میں شامل ہیں، تاہم سنجے دت کی فلموں کی تعداد انہیں نمایاں بناتی ہے۔
ماہرین کا کہنا ہے کہ بھارتی فلموں کی عالمی مقبولیت میں اضافے اور ٹکٹوں کی بڑھتی ہوئی قیمتوں کے باعث مستقبل میں مزید فلمیں ہزار کروڑ کلب میں شامل ہو سکتی ہیں۔
آنے والے بڑے فلموں میں ہدایتکار ایس ایس راجامولی کی نئی فلم اور ہدایتکار نتیش تیواری کی رامائنہ سیریز شامل ہیں، جن سے بھی ریکارڈ کاروبار کی توقع کی جا رہی ہے۔
دلچسپ بات یہ ہے کہ ان فلموں کے ذریعے مہیش بابو، پریانکا چوپڑا اور یش جیسے اداکار بھی اس نمایاں کلب میں اپنی جگہ بنا سکتے ہیں، جبکہ رنبیر کپور بھی اس سنگ میل کے قریب پہنچ چکے ہیں۔
