سید ابو الاعلیٰ مودودی ؒ کی کتاب دینیات عالمی سطح پر Towards Understanding Islam کے نام سے مشہور ہے۔مولانا مودودی نے یہ کتاب1937 میں خاص طور پر ان طلبہ کے لیے لکھی جو جدید اور اعلیٰ تعلیمی اداروں میں زیر تعلیم تھے۔ اس کتاب کا بنیادی مقصد اسلام کو ایک روایتی عقیدے کے بجائے ایک منطقی اور مکمل نظامِ زندگی کے طور پر پیش کرنا ہے۔ مصنف کے نزدیک محض فقہی جزئیات، نماز و روزہ وغیرہ کے طریقے سکھلانے سے پہلے یہ ضروری ہے کہ طالب علم کے ذہن میں یہ بات بٹھائی جائے کہ اسلام کیا ہے اور کیوں ہے۔دینِ اسلام کی جامع تعلیمات کو سمجھنا اور اس کے عملی مفاہیم کو جانچنا ہر مسلمان کے علمی اور روحانی فہم کا حصہ ہے۔ مولانا مودودی ؒ کی تحریر کردہ دینیات کی کتاب اپنے وقت کی علمی و فکری روشنی میں نہ صرف اسلامی عقائد، عبادات اور اخلاقیات کی وضاحت کرتی ہے بلکہ قاری کو یہ بھی دعوت دیتی ہے کہ وہ دین کی تعلیمات کو عملی زندگی میں کس طرح نافذ کر سکتا ہے۔ مولانا سید ابوالاعلیٰ مودودیؒ کی کتاب دینیات برصغیر کے دینی تعلیمی لٹریچر میں ایک منفرد اور بنیادی حیثیت رکھتی ہے۔ یہ کتاب محض عقائد کا بیان نہیں بلکہ اسلام کو ایک ہمہ گیر نظامِ حیات کے طور پر سمجھانے کی سنجیدہ اور منظم کوشش ہے۔ تدریسی نقطء نظر سے دیکھا جائے تو دینیات ایک ایسی نصابی کتاب ہے جو قاری کے ذہن میں سوال پیدا کرتی ہے، پھر انہی سوالات کی روشنی میں ایمان، عبادات اور اخلاق کو ایک مربوط فکر میں ڈھالتی ہے۔
کتاب کے ابتدائی اسباق میں مولانا مودودیؒ دین کی تعریف کو محض مذہبی رسومات تک محدود نہیں رکھتے بلکہ واضح کرتے ہیں کہ دین دراصل انسان کی پوری زندگی پر اللہ کی حاکمیت کو تسلیم کرنے کا نام ہے۔ وہ اس نکتے پر زور دیتے ہیں کہ اگر خدا خالق ہے تو ضابطہ حیات دینے کا حق بھی اسی کو حاصل ہے۔ یہ تصور طالب علم کو ابتدا ہی میں مذہب اور جدید زندگی کی مصنوعی تقسیم سے نجات دلاتا ہے۔ مفہومًا مولانا لکھتے ہیں کہ اسلام انسان کو یہ نہیں سکھاتا کہ وہ زندگی کے ایک حصے میں خدا کا تابع ہو اور باقی حصوں میں خود مختار، بلکہ اسلام مکمل اطاعت کا مطالبہ کرتا ہے۔یہ اسلوب تدریسی اعتبار سے نہایت مؤثر ہے کیونکہ یہ طالب علم کو فکری ہم آہنگی عطا کرتا ہے۔کتاب کے پہلے باب میں مصنف نے کائنات کی ہر شئے کو مسلم قرار دیا ہے۔ وہ دلیل دیتے ہیں کہ سورج، چاند اور ستارے ایک مقررہ قانون کے پابند ہیں، اس لیے وہ فطرتاََ فرماں بردار یعنی مسلم ہیں۔انسان بھی اپنے جسمانی نظام، سائنس، خون کی گردش کے لحاظ سے مسلم ہے خواہ وہ شعوری طور پر کافر ہی کیوں نہ ہو۔ مصنف لکھتے ہیں کہ ”تمہارا سر بھی پیدائشی مسلم ہے کہ جس کو تم زبردستی اللہ کے سوا دوسروں کے سامنے جھکاتے ہو“۔
ایمان کے باب میں مولانا مودودیؒ محض اعتقادی بحث نہیں چھیڑتے بلکہ یہ سوال اٹھاتے ہیں کہ ایمان انسان کے عمل پر کیسے اثر انداز ہوتا ہے؟ وہ واضح کرتے ہیں کہ ایسا ایمان جو کردار میں تبدیلی پیدا نہ کرے، محض زبانی دعویٰ ہے۔یہ نکتہ خاص طور پر تعلیمی اداروں میں پڑھائے جانے والے مذہبی مضامین کے لیے راہنما حیثیت رکھتا ہے، کیونکہ یہاں ایمان کو اخلاقی تربیت کے ساتھ جوڑا گیا ہے، نہ کہ محض یادداشت کے ساتھ۔دوسرے باب میں مصنف نے واضع کیا کہ اندھی تقلید یا ضعیف الاعتقادی کے بجائے علم اور یقین ایمان کی بنیادہیں۔ مصنف لکھتے ہیں کہ جب تک انسان کو اللہ کی حاکمیت کا شعور نہ ہو وہ سچا مطیع و فرمانبردار نہیں بن سکتا۔ کتاب میں نماز، روزہ اور زکوٰۃ کو صرف چند رسوم کے طور پر نہیں بلکہ ایک ایسی مشق کے طور پر پیش کیا گیا ہے جو انسان کو عملی زندگی میں اللہ کا وفادار سپاہی بناتی ہے۔ مصنف کا اصرار ہے کہ طالب علم کو پہلے یہ بتایا جائے کہ نماز کیوں فرض ہے، پھر یہ کہ اسے کیسے ادا کرنا ہے۔ نماز، روزہ، زکوٰۃ اور حج کے مباحث میں مولانا مودودیؒ عبادات کو روحانی مشق کے ساتھ ساتھ سماجی اور اخلاقی تربیت کا ذریعہ قرار دیتے ہیں۔ مثال کے طور پر نماز کو نظم و ضبط، مساوات اور جواب دہی کی عملی مشق کہا گیا ہے۔ وہ اس خیال کی طرف راہنمائی کرتے ہیں کہ نماز اگر انسان کو برائی سے نہ روکے تو اس کی روح باقی نہیں رہتی۔یہ اندازِ بیان تدریسی سطح پر عبادات کو ایک زندہ عمل بنا دیتا ہے، نہ کہ رسمی عمل۔
کتاب کے اہم ابواب میں اخلاقی اقدار اور معاشرتی ذمہ داریوں پر بحث کی گئی ہے۔ مولانا مودودیؒ فرد کو معاشرے سے الگ اکائی نہیں سمجھتے بلکہ اسے ایک ذمہ دار شہری اور امت کا رکن قرار دیتے ہیں۔ وہ دیانت، عدل اور امانت کو محض ذاتی خوبیاں نہیں بلکہ اجتماعی نظام کی بنیاد بتاتے ہیں۔یہ پہلو خاص طور پر جدید سماجی علوم پڑھنے والے طلبہ کے لیے اسلام کی عملی معنویت کو واضح کرتا ہے۔
دینیات کی خوبصورتی اس کی سادگی اور ربط میں پوشیدہ ہے۔ مولانا مودودیؒ نے پیچیدہ فلسفیانہ مسائل کو عام فہم اور دلکش زبان میں بیان کیا ہے۔ کائنات کے ذرے ذرے کو ایک عظیم قانون کا پابند دکھا کر مصنف نے قاری کے ذہن میں ایک ہم آہنگ کائنات کا تصور پیدا کیا ہے، جو جمالیاتی اعتبار سے نہایت پر کشش ہے۔ کتاب کا اسلوب اتنا خشک نہیں بلکہ دعوتی اور مکالماتی ہے، جو قاری کو محسوس کراتا ہے کہ وہ خود اس عظیم نظام کا ایک اہم حصہ ہے۔ یہ کتاب عقل اور خالق کے درمیان ایک مضبوط مکالمہ ہے۔ مصنف نے انسان کی مجبوری یعنی قانون قدرت کی ماتحتی اور اختیار یعنی انتخاب کی آزادی کے درمیان ابدی تضاد کو نہایت عمدگی سے حل کیا ہے۔ وہ کہتے ہیں کہ کمال یہ ہے کہ انسان اپنے اس اختیار کو استعمال کرتے ہوئے رضاکارانہ طور پر اسی خدا کی بندگی اختیار کرے جس کا وہ فطری طور پر پہلے ہی پابند ہے۔ یہ کتاب اپنے دور کے روایتی مذہبی نصاب جو صرف فقہی مسائل تک محدود تھا کے خلاف ایک فکری رد عمل تھی۔ مصنف نے ثابت کیا ہے کہ اسلام محض چند عقائد کا مجموعہ نہیں بلکہ ایک متحرک جدلیاتی قوت ہے جو انسانی زندگی کے ہر کوزے سیاست، معیشت اور معاشرت پر اثر انداز ہوتی ہے۔
دینیات محض ایک درسی کتاب نہیں بلکہ اسلامی فکر کی تشکیلِ نو کا اہم ذریعہ بھی ہے۔اس کا تدریسی اسلوب طالب علم کو ماننے کے بجائے جاننے کی طرف مائل کرتا ہے، جو اسے جدید دور کے چیلنجز کا مقابلہ کرنے کے قابل بناتا ہے۔تعلیمی اور تدریسی تناظر میں دیکھا جائے تودینیات محض ایک مذہبی نصاب نہیں بلکہ فکری تربیت گاہ ہے۔ یہ کتاب مسلمان طالب علم کو یہ شعور دیتی ہے کہ اسلام عبادات کا مجموعہ نہیں بلکہ ایک مکمل ضابطء حیات ہے، جس کا مقصد انسان کی فردی اور اجتماعی اصلاح ہے۔آج کے فکری انتشار کے دور میں دینیات جیسی کتابیں نہ صرف نصابی ضرورت ہیں بلکہ ذہنی و اخلاقی راہنمائی کا معتبر ذریعہ بھی ہیں۔دینیات کی سب سے بڑی خوبی اس کا سادہ، منطقی اور سوال و جواب پر مبنی اسلوب ہے۔ یہی وجہ ہے کہ یہ کتاب مدارس کے ساتھ ساتھ جدید تعلیمی اداروں میں بھی یکساں افادیت رکھتی ہے۔ مولانا مودودیؒ قاری کو اندھی تقلید پر نہیں چھوڑتے بلکہ اسے سوچنے، پرکھنے اور نتیجہ اخذ کرنے کی تربیت دیتے ہیں۔
