ازبکستان اور اردن نے تعلقات کو نئی بلندیوں تک لے جانے کے لیے 15 اہم معاہدوں پر دستخط کیے ہیں۔ یہ پیش رفت اردن کے فرمانروا شاہ عبداللہ دوم کے سمرقند کے دورے کے موقع پر سامنے آئی۔
ازبکستان کے صدر شوکت مرزائیوف اور شاہ عبداللہ دوم نے ایک مشترکہ اعلامیہ جاری کیا جس کا مقصد دونوں ممالک کے درمیان اسٹریٹجک شراکت داری کو مزید مضبوط بنانا ہے۔
معاہدوں میں ملزمان کی حوالگی، سرمایہ کاری کے فروغ و تحفظ، اور ایک مشترکہ کمیشن کے قیام جیسے اہم امور شامل ہیں۔ دونوں ممالک نے شہریوں کی آسانی کے لیے ویزا شرائط ختم کرنے پر بھی اتفاق کیا ہے۔
اعلیٰ تعلیم، سائنسی تحقیق اور سیاحت کے شعبوں میں تعاون بڑھانے کے ساتھ ساتھ فضائی رابطے اور تجارتی سامان کی آن لائن نگرانی کے لیے بھی پروٹوکول طے پائے۔
زرعی شعبے میں بھی تعاون کو فروغ دینے پر اتفاق ہوا ہے، جس میں پودوں کی بیماریوں سے بچاؤ، ویٹرنری سروسز اور زرعی ترقی سے متعلق معاہدے شامل ہیں۔
فریقین نے ایک عملی منصوبہ بھی منظور کیا ہے تاکہ طے پانے والے معاہدوں پر مؤثر انداز میں عملدرآمد یقینی بنایا جا سکے۔
