ازبکستان کے صدر شوکت مرزائیوف نے ترکمانستان کے شہر ترکمن باشی پہنچنے پر ترکمن عوام کے قومی رہنما اور “خلق مجلس” کے چیئرمین قربان قُلی بردی محمدوف سے ملاقات کی۔
ملاقات کے آغاز میں ازبک صدر نے تیسرے ‘اقوام متحدہ کے اجلاس برائے خشکی سے گھِرے ترقی پذیر ممالک ‘کی کامیاب میزبانی پر بردی محمدوف کو دلی مبارکباد دی اور کانفرنس کے ایجنڈے میں شامل نکات کو خطے کی پائیدار ترقی کے لیے اہم قرار دیا۔
دونوں رہنماؤں نے اپریل میں سمرقند میں ہونے والی ملاقات میں طے پانے والے معاہدوں کی روشنی میں دوطرفہ تعلقات، خوشگوار ہمسائیگی اور اسٹریٹجک شراکت داری کو مزید مضبوط بنانے کے امور پر بات چیت کی۔
فریقین نے اطمینان کا اظہار کیا کہ دونوں ممالک کے درمیان تعاون دوستی، باہمی اعتماد اور مشترکہ مفادات کے اصولوں پر تیزی سے فروغ پا رہا ہے۔
ملاقات میں بتایا گیا کہ رواں سال کے آغاز سے اب تک دوطرفہ تجارت کا حجم 600 ملین ڈالر تک پہنچ چکا ہے، جب کہ صنعت، توانائی، ٹرانسپورٹ، زراعت اور آبی وسائل سمیت مختلف شعبوں میں تعاون میں اضافہ ہوا ہے۔
سرحدی تجارت کو فروغ دینے کے لیے “شاوت – داشوغز” کے نام سے ایک مشترکہ تجارتی زون قائم کیا جا رہا ہے، جب کہ بین الاضلاعی روابط اور ثقافتی تبادلے بھی جاری ہیں۔
آئندہ اعلیٰ سطحی اجلاسوں کی تیاری کے سلسلے میں بین الحکومتی کمیشنز، بزنس کونسل، علاقائی فورم اور متعدد ثقافتی تقریبات کے انعقاد کی منصوبہ بندی بھی کی گئی ہے۔
اس موقع پر اقوام متحدہ کی کانفرنس اور رواں سال خزاں میں تاشقند میں ہونے والے وسطی ایشیائی ممالک کے سربراہان کے ساتویں مشاورتی اجلاس کے ایجنڈے پر بھی تفصیلی تبادلہ خیال کیا گیا۔
