ازبکستان کرکٹ فیڈریشن (UCF) کو باضابطہ طور پر ایشین کرکٹ کونسل (ACC) کا مکمل رکن منتخب کر کے ازبکستان کے لیے کھیلوں کی دنیا میں ایک اہم سنگِ میل عبور ہوا ہے۔ یہ اعلان ڈھاکہ، بنگلہ دیش میں ہونے والی ACC کانفرنس میں کیا گیا جہاں ازبکستان کی نمائندگی UCF کے چیئرمین عزیز میخلئیف نے کی۔
یہ کامیابی 2022 میں انٹرنیشنل کرکٹ کونسل (ICC) کی طرف سے ایسوسی ایٹ ممبر بننے کے بعد حاصل ہوئی ہے۔
چیئرمین میخلئیف نے اس موقع پر کہا کہACC کی رکنیت کرکٹ کی ترقی کے لیے تاریخی قدم ہے۔ اس سے ازبکستان ایشیا کی کرکٹ فیملی کا حصہ بن گیا ہے اور ہمیں اس کھیل کو ہر سطح پر فروغ دینے کا موقع ملے گا۔
گزشتہ برسوں میں ازبکستان میں کرکٹ کا رجحان تیزی سے بڑھا ہے۔ ICC کی مدد اور قومی پالیسیوں کے تحت کرکٹ کو 253 کھیلوں کے اسکولوں، تعلیمی اداروں اور کلبز میں متعارف کروایا جا چکا ہے۔ 4 ہزار سے زائد فعال کھلاڑی مختلف شہروں اور دیہی علاقوں میں اس کھیل میں حصہ لے رہے ہیں۔
نوجوانوں کی دلچسپی، تربیت یافتہ کوچز، اور جدید انفراسٹرکچر کی تیاری پر خصوصی توجہ دی جا رہی ہے۔ تاشقند، چرچک، اور سمرقند میں کرکٹ کی سہولیات بنائی گئی ہیں جہاں قومی ٹیم کے کھلاڑیوں کی تربیت جاری ہے۔
اس موقع پر فیڈریشن نے صدر شوکت مرزائیوف اور ریاستی اداروں کا شکریہ ادا کیا جنہوں نے کھیلوں کے فروغ میں بھرپور مدد فراہم کی۔
