معروف بھارتی ماڈل اور اداکارہ شیفالی جریوالا، جنہوں نے 2002 کے مشہور ریمکس گانے ‘کاانٹا لگا’ سے شہرت حاصل کی تھی، 42 برس کی عمر میں دل کا دورہ پڑنے سے انتقال کر گئیں۔
ان کی اچانک موت نے ان کے مداحوں اور شوبز انڈسٹری کو افسردہ کر دیا ہے، اور ان کے مختصر مگر یادگار فنی سفر کو لوگ یاد کر رہے ہیں۔
شیفالی جریوالا کا فنی سفر اگرچہ مختصر رہا، مگر انہوں نے پاپ کلچر پر گہرا نقش چھوڑا۔ ان کا پہلی اور سب سے مشہور انٹری ‘کاانٹا لگا’ میوزک ویڈیو میں ہوئی، جس نے انہیں راتوں رات شہرت کی بلندیوں پر پہنچا دیا۔ مگر 2004 میں ریلیز ہونے والی فلم مجھ سے شادی کروگی میں ان کا دو منٹ کا کیمیو آج بھی فلمی شائقین کو یاد ہے۔
"بجلی ہوں میں، ٹچ مت کرنا،کرنٹ لگے گی”
ڈیوڈ دھون کی ہدایت کاری میں بننے والی اس کامیڈی فلم میں سلمان خان اور اکشے کمار، پرینکا چوپڑا کی توجہ حاصل کرنے کے لیے ایک دوسرے سے مقابلہ کرتے ہیں۔ شیفالی کا کردار ‘بجلی’ کے نام سے تھا، اور ان کا فلم میں انٹری سین ،جہاں وہ سلو موشن میں آتی ہیں، بال جھٹکتی ہیں اور کہتی ہیں:
"بجلی ہوں میں ،ٹچ مت کرنا، کرنٹ لگے گی”نہ صرف فلم کا نمایاں لمحہ بن گیا بلکہ پروموشنل مٹیریلز اور شائقین کی گفتگو کا بھی حصہ رہا۔
شیفالی جریوالا کا فنی سفر محدود رہا، مگر ان کی موجودگی ہر پراجیکٹ میں محسوس کی گئی۔ ان کی اچانک رخصتی ان کے مداحوں کے لیے ایک بڑا صدمہ ہے، اور بھارتی تفریحی دنیا نے ایک منفرد اور یادگار شخصیت کھو دی ہے۔
