پاکستان کی باہمت خاتون کوہ پیما سمر خان نے ایک اور تاریخی کارنامہ سر انجام دیتے ہوئے جنوبی امریکہ کی بلند ترین چوٹی، ماؤنٹ اکنکاگوا، پر پاکستانی پرچم لہرا دیا ۔
ارجنٹائن میں واقع 6961 میٹر بلند چوٹی کو شدید سردی ، تیز ہواؤں اور مشکل ترین حالات کا مقابلہ کرتے ہوئے پاکستانی کوہ پیما سمر خان نے سر کر لیا ۔
سمر خان کا کہنا ہے ، یہ کامیابی ان کیلئے صرف چڑھائی نہیں بلکہ ایمان، ہمت اور استقامت کی جیتی جاگتی مثال ہے۔ انہوں نے اپنی کامیابی کو اللہ پاک کی مہربانیوں اور خاندان، دوستوں اور چاہنے والوں کی دعاؤں کو قرار دیا ہے ۔
ماؤنٹ اکنکاگوا دنیا کی بلند ترین چوٹیوں میں سے ایک ہے ، اور ایشیا کے باہر بلند ترین چوٹی ہے۔ اس کا غیر ہموار راستہ، ناقابلِ یقین موسم اور انتہائی بلندی پر چڑھائی کوہ پیماؤں کے لیے اسے مزید مشکل بناتے ہیں ، لیکن سمر خان نے اپنی ہمت ، لگن ، جذبے اور حوصلے سے یہ چیلنج قبول کرتے ہوئے اس میں کامیابی سمیٹی ہے ۔
سمر خان کی کامیابیاں یہیں تک محدود نہیں ، 2024 میں، وہ یورپ کی بلند ترین چوٹی، ماؤنٹ ایلبرس، پر سنوبورڈنگ کرنے والی بھی پہلی پاکستانی خاتون بنیں۔ اس سے قبل، وہ اپنی پہاڑی بائیک پر دنیا کے مشکل ترین راستوں میں سے ایک، کے ٹو کے بیس کیمپ تک پہنچنے والی پہلی خاتون کا اعزاز بھی حاصل کر چکی ہیں ۔
سمر خان نے انسٹاگرام پر اپنے اس سفر کی جھلکیاں بھی شیئر کی ہیں، جن میں انہیں مشکل ترین مہم کے دوران پیش آنے والے حالات اور جذباتی لمحات کی عکاسی کی گئی ہے ۔
