سردیوں کے موسم میں اکثر لوگ محسوس کرتے ہیں کہ کپڑے تنگ ہونے لگے ہیں، جسم بھاری محسوس ہوتا ہے اور وزن بڑھنے لگتا ہے۔ ماہرین کے مطابق یہ ایک عام مسئلہ ہے جس کی وجہ موسم، کھانے پینے کی عادات اور روزمرہ کی سرگرمیوں میں تبدیلیاں ہیں، لیکن چند آسان اقدامات سے اس پر قابو پایا جا سکتا ہے۔
سرد موسم میں جسم کو گرم رکھنے کے لیے زیادہ توانائی کی ضرورت ہوتی ہے، جس سے بھوک بڑھ جاتی ہے۔ دن چھوٹے اور سورج کی روشنی کم ہونے کی وجہ سے تھکن اور سستی بھی محسوس ہوتی ہے، جس کے نتیجے میں زیادہ کھانے کی رغبت پیدا ہو سکتی ہے۔ سردیوں میں لوگ عموماً گرم، تلی ہوئی اور زیادہ چکنائی والے کھانے پسند کرتے ہیں جیسے حلوہ، پراٹھے اور نہاری۔ یہ کھانے عارضی توانائی دیتے ہیں، لیکن زیادہ کھانے سے وزن بڑھتا ہے۔
سرد موسم میں جسمانی سرگرمی کم ہو جاتی ہے کیونکہ باہر ورزش کرنا مشکل ہو جاتا ہے۔ کم پانی پینا بھی مسئلہ پیدا کرتا ہے کیونکہ سردی میں کم پیاس لگتی ہے۔ پانی کی کمی میٹابولزم کو سست کر دیتی ہے اور جسم بھوک اور پیاس میں فرق نہ کر پاتا ہے، جس سے زیادہ کھانے کی عادت بڑھ جاتی ہے۔
نیند کے معمولات میں تبدیلی بھی اہم کردار ادا کرتی ہے۔ دیر تک جاگنا یا دیر سے اٹھنا ہارمونز پر اثر ڈال کر بھوک کے سگنلز بڑھا دیتا ہے، جس سے کھانے کی مقدار بڑھ جاتی ہے۔
ماہرین تجویز کرتے ہیں کہ سردیوں میں وزن کنٹرول کرنے کے لیے متوازن اور گرم کھانے کھائیں، جیسے سوپ، دلیہ، سبزیاں، دالیں اور بھاپ میں پکائے ہوئے کھانے۔ تلی ہوئی اور میٹھی چیزوں سے پرہیز کریں۔ روزانہ جسمانی سرگرمی جاری رکھیں، چاہے وہ گھر میں ورزش، یوگا، اسٹریچنگ یا سیڑھیاں چڑھنا ہو۔ پانی، نیم گرم پانی، سبز چائے یا جڑی بوٹیوں والی چائے کا استعمال بھی ضروری ہے۔
کھانے کے اوقات مقرر کریں تاکہ رات دیر سے زیادہ کھانے سے بچا جا سکے، سات سے آٹھ گھنٹے نیند لیں اور ہلکی چہل قدمی، گہری سانسیں یا مشغلے کے ذریعے ذہنی دباؤ کم کریں۔ ماہرین کا کہنا ہے کہ سردیوں میں وزن بڑھنا لازمی نہیں۔ متوازن غذا، مناسب سرگرمی، پانی کی مناسب مقدار اور باقاعدہ نیند سے سردیوں کا لطف اٹھاتے ہوئے وزن اور صحت برقرار رکھی جا سکتی ہے
