نائب وزیر اعظم و وزیر خارجہ اسحٰق ڈار نے سعودی وزیر خارجہ سے گفتگو میں سعودی عرب کی خودمختاری اور جغرافیائی سالمیت کیلئے پاکستان کے غیر متزلزل عزم اور فلسطینی کاز کی بھرپور حمایت کا اعادہ کیا گیا ہے ۔
ترجمان دفتر خارجہ کی جانب سے جاری کئے گئے بیان کے مطابق نائب وزیر اعظم و وزیر خارجہ سینیٹر محمد اسحاق ڈار کا سعودی وزیر خارجہ شہزادہ فیصل بن فرحان آل سعود سے ٹیلی فونک رابطہ ہوا ہے ۔ جس میں اسرائیلی وزیر اعظم نیتن یاہو کے غیر ذمہ دارانہ اور اشتعال انگیز بیانات کی شدید الفاظ میں مذمت کی گئی ہے ۔
اسحاق ڈار نے اپنی گفتگو میں سعودی عرب کی خودمختاری اور جغرافیائی سالمیت کیلئے پاکستان کے غیر متزلزل عزم اور فلسطینی کاز پر سعودی عرب کی بھرپور حمایت کا اعادہ کیا۔
سعودی وزیر خارجہ نے مملکت کے تقدس اور حرمت کے دفاع میں پاکستان کی دیرینہ اور مستقل حمایت پر نائب وزیر اعظم و وزیر خارجہ اسحاق ڈار کا شکریہ ادا کیا۔
جاری کئے گئے بیان کے مطابق دونوں رہنماؤں کے درمیان بات چیت کے دوران غزہ کی تازہ صورتحال پر غور و خوض کے لیے او آئی سی کے وزرائے خارجہ کا ہنگامی اجلاس فوری طور پر بلانے پر بھی اتفاق کیا گیا ۔
