رمضان المبارک کے بابرکت مہینے کے دوران مسجد نبوی میں روزےداروں کیلئے افطار فراہم کروانے کے خواہش مند افراد اور اداروں کیلئے جنرل اتھارٹی برائے حرمین شریفین سے اجازت لینا ہو گی ، اس حوالے سے ایک آن لائن پورٹل بھی متعارف کروائی گئی ہے ۔
عرب میڈیا کے مطابق پورٹل کے ذریعے روزہ داروں کو افطاری کرانے کی سعادت حاصل کرنے کے خواہش مند اداروں اور افراد کا باقاعدہ اندراج کیا جائے گا۔ اتھارٹی سے منظوری لینے والی کمپنیوں اورافراد کو ہی مسجد نبویؐ میں افطاری کرانے کے اجازت ہو گی ۔ اجازت لینے والی کمپنیوں اور افراد کی باقاعدہ فہرشت شائع کی جائے گی ۔
اتھارٹی برائے حرمین شریفین کے مطابق افطاری کروانے والوں کے اندراج سے افطاری زیادہ منظم اور باوقار انداز سے پایہ تکمیل تک پہنچائی جائے گی ۔ ڈیٹا کے حصول اور اجازت نامے سے افطاری کے انتظامات کو بہتر بنانے کا موقع ملے گا۔ افطاری کےدوران ہجوم،بد نظمی اور کھانے پینے کی اشیا کا ضیاع بھی روکا جا سکے گا ۔
واضح رہے گزشتہ ماہ اتھارٹی نے مکہ مکرمہ میں بھی افطاری کروانے کے خواہش مندوں کی رجسٹریشن کیلئے ایک پورٹل کا آغاز کیا تھا۔جسکے ذریعے افراد کو ایک جبکہ اداروں کو افطار کرانے کی 10 سروس سائٹ منتخب کرنے کی اجازت دی گئی تھی۔
تاہم اتھارٹی نے خبردار کیا ہے کہ افطاری کی فراہمی کے دوران دائمی بیماریوں اور ذیابیطس میں مبتلا افراد کیلئے کم کیلوریز والے کھانوں کی فراہمی کو مد نظر رکھا جائے ۔
