اسرائیلی وزیر خارجہ گیڈئین سار نے اقوام متحدہ کی انسانی حقوق کونسل کے صدر کو لکھے گئے خط میں کہا ہے کہ امریکا کی طرح اسرائیل بھی انسانی حقوق کونسل سے دستبردار ہورہا ہے۔
اسرائیلی وزیر خارجہ نے اپنے خط میں لکھا ہے کہ انسانی حقوق کونسل کے اسرائیل کے خلاف متعصبانہ رویے کی وجہ سے وہ کونسل چھوڑ رہے ہیں۔ ان کا کہنا ہے کہ اسرائیل اب اقوام متحدہ کی انسانی حقوق کونسل کے اجلاسوں میں شریک نہیں ہو گا ۔
اسرائیلی وزیر خارجہ نے انسانی حقوق کونسل کے صدر کو لکھے گئے اپنے خط کو سماجی رابطے کے پلیٹ فارم ایکس پر بھی شیئر کیا ہے۔
واضح رہے ، دو روز قبل امریکی صدر ڈونلڈ ٹرمپ نے بھی اقوام متحدہ کی انسانی حقوق کونسل سے نکلنے کے ایگزیکٹو آرڈر پر دستخط کیے تھے۔ایگزیکٹو آرڈر کے مطابق امریکا اقوام متحدہ کی انسانی حقوق کونسل اور فلسطینیوں کیلئے قائم اقوام متحدہ کی امدادی ایجنسی انروا سے بھی دستبردار ہو رہا ہے جبکہ امریکا اقوام متحدہ کے تعلیمی، سائنسی اور ثقافتی ادارے (یونیسکو) میں اپنی شمولیت پر نظرِثانی کرے گا۔
