پاکستان میں بڑھتی ہوئی اسموگ کے بعد بھارت میں بھی اس کے اثرات نمایاں ہو رہے ہیں۔ بھارتی دارالحکومت نئی دہلی میں فضائی آلودگی کے باعث تمام پرائمری اسکول بند کر دیے گئے ہیں اور آن لائن کلاسز شروع کرنے کی ہدایت کی گئی ہے۔
بڑھتی آلودگی کی وجوہات
نئی دہلی، جہاں تقریباً 3 کروڑ افراد مقیم ہیں، سردیوں کے موسم میں شدید فضائی آلودگی کا شکار ہو جاتا ہے۔ یہ اسموگ زیادہ تر کھیتوں میں فصلوں کی باقیات جلانے اور فیکٹریوں اور گاڑیوں سے نکلنے والے دھوئیں کے باعث پیدا ہوتی ہے۔
آلودگی کم کرنے کے لیے حفاظتی تدابیر
شہر میں آلودگی کم کرنے کے لیے حکومت وقتاً فوقتاً تعمیراتی سرگرمیوں اور ڈیزل انجن ٹرکوں کے داخلےپر پابندی عائد کرتی ہے۔
بھارتی سپریم کورٹ کا حکم
گزشتہ ماہ، بھارتی سپریم کورٹ نے صاف فضا کو بنیادی انسانی حق قرار دیتے ہوئے مرکز اور ریاستی حکومتوں کو آلودگی کم کرنے کے لیے اقدامات کرنے کی ہدایت کی تھی۔
