اسرائیلی فورسز کی جانب سے غزہ جنگ بندی معاہدے کی خلاف ورزیوں پر حماس نے اسرائیلی یرغمالیوں کی رہائی غیر معینہ مدت تک ملتوی کردی۔
فلسطینی مزاحمتی تنظیم حماس کے عسکری ونگ القسام بریگیڈز کے ترجمان ابو عبیدہ نے اپنے ایک بیان میں جنگ بندی کی خلاف ورزی پر یرغمالیوں کی رہائی روکنے کا اعلان کیا۔
ابو عبیدہ کا اپنے بیان میں کہنا تھا ، گزشتہ 3 ہفتوں کے دوران اسرائیل کی جانب سے جنگ بندی معاہدے کی متعدد خلاف ورزیوں کو نوٹ کیا گیا جن میں بے گھر فلسطینیوں کی شمالی غزہ واپسی میں تاخیر اور ان پر بمباری کرنا شامل تھا۔
ابو عبیدہ نے کہا ، غزہ کی پٹی کے متعدد علاقوں میں طے شدہ طریقے کے مطابق امداد بھی نہیں پہنچائی گئی ۔ مزاحمتی گروہوں نے جنگ بندی معاہدے کی مکمل پاسداری کی۔ابو عبیدہ نے کہا کہ ان وجوہات کے باعث 15 فروری 2025 کو اسرائیلی یرغمالیوں کی ہونے والی رہائی روک دی گئی ہے ۔
ابو عبیدہ کا کہنا تھا ، یرغمالیوں کو اس وقت تک رہا نہیں کیا جائے گا جب تک اسرائیل معاہدے میں طے شدہ نکات پر مکمل عمل نہیں کرتا اور اس حوالے سے ہونے والے نقصانات کی تلافی نہیں کرتا ۔
ابو عبیدہ نے مزید کہا ، اسرائیل جنگ بندی معاہدے پر عمل کرے گا تو وہ بھی معاہدے پر مکمل عملدرآمد کریں گے ۔
واضح رہے ، فلسطینی مزاحمتی تنظیم حماس نے اس سے قبل بھی اسرائیل کی جانب سے معاہدے کی خلاف ورزی کا الزام عائد کیا تھا۔
حماس کی جانب سے سے کہا گیا تھا کہ اسرائیل نے غزہ میں طے شدہ تعداد کے مطابق خیمے اور پہلے سے تیار گھر نہیں دیے جبکہ اسرائیل سڑکیں کھولنے اور ملبہ ہٹانے کے لیے بھاری مشینری بھی غزہ میں داخلے سے روک رہا ہے ۔
