غیر ملکی میڈیا کے مطابق، ڈنمارک میں حال ہی میں قرآن پاک کی بے حرمتی کو غیر قانونی قرار دینے کے نئے قانون کے تحت دو افراد کے خلاف مقدمہ درج کیا گیا ہے۔ یہ قانون 7 دسمبر 2023 کو منظور کیا گیا تھا اور چند روز بعد نافذ العمل ہو گیا تھا، جس کے تحت اس عمل کو انجام دینے والوں کو جرمانے یا دو سال تک قید کی سزا دی جا سکتی ہے۔
رپورٹس کے مطابق، ملزمان کی شناخت ظاہر نہیں کی گئی، تاہم ان پر الزام ہے کہ انہوں نے جون میں ایک تہوار کے دوران قرآن پاک کی بے حرمتی کی تھی۔ حکام اور مقامی میڈیا نے ان کے اقدامات کی مزید تفصیلات فراہم نہیں کیں۔
یاد رہے کہ 2023 میں ڈنمارک اور سوئیڈن میں قرآن پاک کی بے حرمتی کے کئی واقعات سامنے آئے تھے، جس پر مسلم دنیا کی جانب سے شدید غم و غصے کا اظہار کیا گیا تھا۔ اسلامی ممالک نے ان مذموم حرکتوں پر پابندی عائد کرنے کا مطالبہ کیا تھا، جس کے بعد ڈنمارک نے یہ قانون منظور کیا۔
نئے قانون کے تحت قرآن پاک یا کسی مقدس کتاب کی بے حرمتی کو سختی سے ممنوع قرار دیا گیا ہے، اور اس کے خلاف ورزی کرنے والوں کے لیے سخت سزائیں مقرر کی گئی ہیں۔ یہ اقدام مسلم دنیا کے دباؤ اور بین الاقوامی تنقید کے بعد کیا گیا، جس کا مقصد مذہبی ہم آہنگی کو فروغ دینا اور مقدس کتابوں کے احترام کو یقینی بنانا ہے۔
اس قانون کے نفاذ کے بعد یہ پہلا موقع ہے کہ کسی پر اس کی خلاف ورزی کا مقدمہ درج کیا گیا ہے، جو اس بات کی عکاسی کرتا ہے کہ ڈنمارک اس معاملے میں سنجیدگی دکھا رہا ہے۔
