آغا خان فاؤنڈیشن کے سربراہ اور روحانی پیشوا آغا خان پنجم، پرنس رحیم آغا خان نے پاکستان اور بھارت کے درمیان بڑھتی ہوئی کشیدگی پر گہری تشویش کا اظہار کرتے ہوئے ثالثی کی پیشکش کر دی ہے۔
غیر ملکی خبر رساں ایجنسی کے مطابق پرنس رحیم نے اس ضمن میں پاکستان اور بھارت کے وزرائے اعظم کو خط لکھ کر دونوں ممالک کے درمیان ثالثی کے لیے آمادگی ظاہر کی ہے۔ انہوں نے کہا کہ وہ چاہتے ہیں کہ خطے میں امن قائم ہو اور مزید کسی انسانی جان کا نقصان نہ ہو۔
اس کے ساتھ ساتھ، پرنس رحیم نے اقوامِ متحدہ کے سیکریٹری جنرل کو بھی ایک خط کے ذریعے اس حساس معاملے میں فعال کردار ادا کرنے کی اپیل کی ہے۔ اپنے خط میں انہوں نے واضح کیا کہ دونوں ممالک کے درمیان بڑھتا ہوا تناؤ خطے کے امن اور ترقی کے لیے شدید خطرہ ہے۔
واضح رہے کہ پرنس رحیم آغا خان کے والد، پرنس کریم آغا خان مرحوم نے بھی ماضی میں پاکستان اور بھارت کے درمیان تنازعے میں ثالثی کا کردار ادا کیا تھا، جسے عالمی سطح پر سراہا گیا تھا۔
یہ پیشکش ایسے وقت میں سامنے آئی ہے جب دونوں ممالک کے درمیان الزامات، سرحدی جھڑپوں اور سفارتی کشیدگی میں اضافہ ہو رہا ہے، اور خطے میں امن و امان کے حوالے سے تشویش بڑھتی جا رہی ہے۔
