پاکستان سپر لیگ کے دسویں ایڈیشن کے دوسرے میچ میں کوئٹہ گلیڈی ایٹرز نے شاندار کارکردگی کا مظاہرہ کرتے ہوئے پشاور زلمی کو 80 رنز سے شکست دے دی۔ زلمی کے پانچ بلے باز کھاتہ کھولے بغیر پویلین واپس لوٹے۔
راولپنڈی کرکٹ اسٹیڈیم میں کھیلے گئے اس میچ میں کوئٹہ گلیڈی ایٹرز نے پہلے بیٹنگ کرتے ہوئے زبردست آغاز کیا۔ کپتان سعود شکیل اور فن ایلن کی نصف سنچریوں کی بدولت کوئٹہ نے مقررہ 20 اوورز میں صرف 3 وکٹوں کے نقصان پر 216 رنز کا بڑا مجموعہ کھڑا کیا۔ فن ایلن کی برق رفتار بیٹنگ نے میدان کو جوش و خروش سے بھر دیا جبکہ سعود شکیل نے متوازن اور ذمہ دارانہ اننگز کھیلی۔
217 رنز کے پہاڑ جیسے ہدف کے تعاقب میں پشاور زلمی کا آغاز انتہائی مایوس کن رہا۔ پہلے ہی اوور میں کپتان بابر اعظم محمد عامر کی گیند پر بغیر کوئی رن بنائے پویلین لوٹ گئے۔ اس کے بعد محمد حارث 13 رنز بنا کر آؤٹ ہوئے جبکہ ٹام کولر کیڈمور اور دیگر تین بلے باز صفر پر آؤٹ ہوکر زلمی کی مشکلات میں اضافہ کرتے گئے۔
اوپنر صائم ایوب واحد بلے باز تھے جنہوں نے مزاحمت کی کوشش کی اور 50 رنز کی نصف سنچری مکمل کی، جبکہ حسین طلعت نے 35 اور مچل اوون نے آخری لمحات میں 31 رنز کی جارحانہ اننگز کھیلی، لیکن ٹیم کو شکست سے نہ بچا سکے۔ زلمی کی پوری ٹیم صرف 13.1 اوورز میں 136 رنز پر ڈھیر ہوگئی۔
کوئٹہ گلیڈی ایٹرز کے ابرار احمد نے تباہ کن بولنگ کرتے ہوئے 4 کھلاڑیوں کو آؤٹ کیا، جبکہ محمد عامر اور عثمان طارق نے 2،2 شکار کیے۔ کائل جمیسن نے ایک کھلاڑی کو آؤٹ کیا۔
میچ میں بیٹنگ اور بولنگ دونوں شعبوں میں شاندار کارکردگی دکھا کر کوئٹہ گلیڈی ایٹرز نے واضح برتری حاصل کی اور پوائنٹس ٹیبل پر اپنے سفر کا فاتحانہ آغاز کیا، جبکہ پشاور زلمی کو پہلے ہی میچ میں سخت شکست کا سامنا کرنا پڑا۔
