راولپنڈی میں گزشتہ 24 گھنٹوں کے دوران ڈینگی کے مزید 2 کیسز رپورٹ ہوئے ہیں، جس کے بعد ضلع میں رواں سال ڈینگی کے تصدیق شدہ کیسز کی مجموعی تعداد 40 ہوگئی ہے۔
سرکاری خبر رساں ادارے ایسوسی ایٹڈ پریس آف پاکستان (اے پی پی) کے مطابق اکتوبر کے ابتدائی چار روز کے دوران راولپنڈی ضلع میں ڈینگی کے 7 نئے تصدیق شدہ کیسز سامنے آئے ہیں، جبکہ مختلف ہسپتالوں کے آئسولیشن وارڈز میں اس وقت 10 تصدیق شدہ مریض زیر علاج ہیں۔
ڈسٹرکٹ ہیلتھ اتھارٹی کی تازہ سرویلنس رپورٹ کے مطابق اکتوبر کے ابتدائی چار روز میں ہسپتالوں میں ڈینگی اسکریننگ کی تعداد 4 ہزار 893 سے بڑھ کر 5 ہزار 94 ہوگئی۔
اس دوران 179 نئے مشتبہ کیسز بھی رپورٹ ہوئے، جس کے بعد 2026 کے دوران ضلع میں ڈینگی کے مشتبہ کیسز کی مجموعی تعداد 4 ہزار 699 تک پہنچ گئی ہے۔
رپورٹ کے مطابق ہسپتالوں میں زیر علاج مجموعی مریضوں کی تعداد 15 سے کم ہو کر 13 ہوگئی، تاہم ان میں ڈینگی کے تصدیق شدہ مریضوں کی تعداد 10 پر برقرار ہے۔
محکمہ صحت کے حکام کا کہنا ہے کہ رواں سال اب تک راولپنڈی ضلع میں ڈینگی کے باعث کوئی موت رپورٹ نہیں ہوئی۔
حالیہ کیسز سی ٹی سی-8، فوجی کالونی، اڈیالہ، واہ، پنڈورہ، قیوم آباد اور دھاماں سیداں سمیت مختلف یونین کونسلز سے رپورٹ ہوئے ہیں۔
ڈینگی لاروا کے حوالے سے زیادہ خطرے والے علاقوں میں بھی اضافہ ریکارڈ کیا گیا ہے۔ بریٹو انڈیکس 10 سے زیادہ رکھنے والی یونین کونسلز کی تعداد 25 سے بڑھ کر 33 ہوگئی ہے، جبکہ رتا امرال، ڈھوک ناجو، فوجی کالونی، ڈھوک بابو عرفان، تخت پڑی اور ہزارہ کالونی میں لاروا کی زیادہ موجودگی ریکارڈ کی گئی۔
دوسری جانب انسدادِ ڈینگی ایس او پیز کی خلاف ورزیوں پر کارروائیاں بھی جاری ہیں۔ متعلقہ ٹیموں نے مزید 81 ایف آئی آرز درج کیں، 8 مقامات سیل کیے اور 92 چالان جاری کیے۔
حکام کے مطابق تازہ کارروائیوں میں 3 لاکھ 24 ہزار روپے کے جرمانے عائد کیے گئے، جس کے بعد اب تک وصول کیے گئے جرمانوں کی مجموعی رقم 31 لاکھ 50 ہزار روپے سے تجاوز کر گئی ہے۔
