لیبیا میں پھنسے 174 بنگلہ دیشی شہریوں کو پیر کے روز وطن واپس لایا گیا۔ بنگلہ دیشی وزارتِ خارجہ کے مطابق یہ افراد بُراق ایئر کی پرواز کے ذریعے صبح 5 بج کر 10 منٹ پر ڈھاکہ کے شاہ جلال بین الاقوامی ہوائی اڈے پہنچے۔
حکام کے مطابق وطن واپسی کا یہ عمل لیبیا میں بنگلہ دیشی سفارت خانے، وزارتِ خارجہ، وزارتِ تارکینِ وطن بہبود و بیرونِ ملک روزگار اور بین الاقوامی ادارۂ مہاجرت (آئی او ایم) کے تعاون سے مکمل کیا گیا۔
واپس آنے والے بیشتر افراد انسانی اسمگلروں کے ذریعے غیرقانونی طور پر یورپ پہنچنے کی کوشش میں لیبیا گئے تھے۔ ان میں سے کئی افراد نے دورانِ قیام اغوا، تشدد اور بدسلوکی جیسے سنگین حالات کا سامنا کیا۔
ہوائی اڈے پر وزارتِ خارجہ اور آئی او ایم کے نمائندوں نے ان کا استقبال کیا اور ان سے درخواست کی کہ وہ اپنے تلخ تجربات عوام کے ساتھ شیئر کریں تاکہ انسانی اسمگلنگ کے خطرات سے متعلق آگاہی پیدا کی جا سکے۔
آئی او ایم کی جانب سے تمام واپس آنے والوں کو سفری اخراجات، خوراک، بنیادی طبی سہولتیں اور عارضی رہائش فراہم کی گئی۔
وزارتِ خارجہ نے کہا ہے کہ لیبیا میں مختلف حراستی مراکز میں موجود بنگلہ دیشی شہریوں کی محفوظ وطن واپسی کے لیے بنگلہ دیشی سفارت خانہ، وزارتِ تارکینِ وطن بہبود و بیرونِ ملک روزگار اور آئی او ایم مشترکہ طور پر کام کر رہے ہیں۔
