دنیا کے مشہور ایتھلیٹ اور سویڈن کے اسٹار کھلاڑی ارمانڈ “مونڈو” ڈوپلانتس نے ایک بار پھر دنیا کو حیران کر دیا ہے۔ انہوں نے ٹوکیو میں جاری ورلڈ ایتھلیٹکس چیمپئن شپ کے دوران 6.30 میٹر (20 فٹ 8 انچ) کی چھلانگ لگا کر پول والٹ کا نیا عالمی ریکارڈ قائم کیا، جو ان کا کیریئر کا 14واں ورلڈ ریکارڈ ہے۔ اس کے ساتھ ہی وہ تیسری بار مسلسل ورلڈ چیمپئن بھی بن گئے۔
ڈوپلانتس نے پہلے ہی مقابلے میں سونے کا تمغہ حاصل کر لیا تھا، جس کے بعد انہوں نے ایک سینٹی میٹر بار کو مزید بلند کروا کر نیا ریکارڈ بنانے کی کوشش کی۔ یہ نیا ہدف ان کے گزشتہ مہینے بوداپیسٹ میں بنائے گئے 6.29 میٹر کے ریکارڈ سے تھوڑا سا زیادہ تھا۔ دو بار ناکامی کے بعد، انہوں نے تیسری کوشش میں شاندار کامیابی حاصل کی، جس پر ٹوکیو کا نیشنل اسٹیڈیم خوشی سے جھوم اٹھا۔
یہ منظر اس وقت کے بالکل برعکس تھا جب چار سال قبل اسی اسٹیڈیم میں ٹوکیو اولمپکس کے دوران کووڈ-19 کی وجہ سے تماشائیوں کو داخلے کی اجازت نہیں تھی۔ اس بار ہجوم نے نہ صرف ڈوپلانتس کو بھرپور داد دی بلکہ اُن کی جیت کا جشن بھی اُن کے ساتھ منایا۔ وہ دوڑتے ہوئے اپنی فیملی کے پاس پہنچے اور خوشی سے گلے لگے، جب کہ دیگر کھلاڑیوں نے بھی انہیں مبارکباد دی۔
اس ایونٹ میں غیر معمولی مقابلہ دیکھنے کو ملا، جہاں 12 میں سے 7 کھلاڑیوں نے 5.90 میٹر کی اونچائی عبور کی۔ آخر میں مقابلہ ڈوپلانتس اور یونان کے ایمنوئیل کارالس کے درمیان رہ گیا، جنہوں نے 6.00 میٹر کی چھلانگ لگا کر سلور میڈل حاصل کیا۔ وہ 6.10، 6.15 اور 6.20 میٹر پر کامیاب نہ ہو سکے، جبکہ ڈوپلانتس نے 6.10 اور 6.15 میٹر کو بھی با آسانی عبور کر لیا۔
ڈوپلانتس کی یہ کامیابی دنیا بھر میں سوشل میڈیا پر وائرل ہو چکی ہے اور ماہرین انہیں تاریخ کا سب سے شاندار پول والٹ کھلاڑی قرار دے رہے ہیں۔ ان کی مسلسل کامیابیاں نہ صرف ایتھلیٹکس کی دنیا میں نیا معیار قائم کر رہی ہیں بلکہ نوجوان کھلاڑیوں کے لیے ایک زبردست مثال بھی بن چکی ہیں۔
