اعلیٰ سطح کا امریکی وفد پاکستان کے دورے پر ہےجہاں سرمایہ کاری کے کئی معاہدوں پر دستخط کیے گئے ہیں۔
ذرائع کے مطابق امریکی سرمایہ کار وفد دو روزہ اہم دورے پر پاکستان آیا ہے ۔ امریکی وفد کی قیادت ٹیکساس ہیج فنڈ کے منیجر اور ٹرمپ خاندان کے قریبی بزنس پارٹنر جینٹری بیچ کر رہے ہیں۔
نئی امریکی حکومت کے اقتدار سنبھالتے ہی سرمایہ کار وفد کا پاکستان آنا انتہائی اہم ہے ۔ امریکی وفد کے دورۂ پاکستان سے دونوں ممالک کے درمیان سرمایہ کاری کو فروغ ملے گا اور دونوں ممالک کے درمیان معاشی اور دو طرفہ تعلقات کی نئی راہیں کھلیں گی۔
دورے کے دوران پاکستان اور امریکا کے درمیان سرمایہ کاری کے کئی اہم معاہدوں پر بھی دستخط کیے گئے ہیں۔ وفد میں شامل اراکین بالخصوص جینٹری بیچ کی پاکستان آمد کو بڑی سفارتی کامیابی قرار دیا جا رہا ہے ۔ ذرائع کے مطابق جینٹری بیچ ٹرمپ خاندان کے قریبی ساتھی ہیں اور وہ صدر ٹرمپ کے گزشتہ انتخابی مقابلوں میں بھی پیش پیش رہے ہیں۔
ذرائع کے مطابق نئی امریکی حکومت کے قیام کے بعد کسی بھی امریکی وفد کا یہ پہلا دورہ ہے۔ امریکی سرمایہ کار وفد کی پاکستان آمد دونوں ممالک کے درمیان معاشی اور دو طرفہ تعلقات کو آگے بڑھانے کی طرف اہم قدم ہے۔
جینٹری بیچ نے گزشتہ دنوں مار اے لاگو میں صدارتی انتخابات کے بعد ایک تقریب میں پاکستان کوزبردست خراج تحسین پیش کرتے ہوئے کہا تھا کہ پاکستانی لوگوں نے دہشت گردی کیخلاف جنگ میں بہت زیادہ قربانیاں دی ہیں، دہشت گردی کے خلاف جنگ میں ہزاروں لوگوں کی جانیں گئیں ۔
انہوں نے کہا تھا کہ پاکستان حیرت انگیز ملک ہے، یہاں کا ماحول امریکی صدر ڈونلڈ ٹرمپ کیلئے سازگار ہے۔ پاکستانی عوام امریکا کے ساتھ مثبت شراکت داری اور اچھے دوست کے طور پر کام کے خواہاں ہیں۔
جینٹری بیچ نے اپنے خطاب کے دوران نومنتخب امریکی صدر ڈونلڈ ٹرمپ پر بھی زور دیا تھا کہ پاکستان اور امریکا کے تعلقات پہلے سے زیادہ مضبوط اور باہمی تعاون پر مبنی بنائیں۔ امریکی سرمایہ کاروں کے وفد کا دورہ، پاکستان اور امریکا کے درمیان مختلف شعبوں میں سرمایہ کاری کیلئے بھی انتہائی سازگار تصور کیا جا رہا ہے ۔
