ازبکستان کے وزیر خارجہ بختیار سعیدوف نے کہا ہے کہ انہوں نے پاکستان کے نائب وزیر اعظم اور وزیر خارجہ اسحاق ڈار سے ٹیلیفون پر بات چیت کی ہے۔
سماجی رابطے کی ویب سائٹ پر جاری بیان میں انہوں نے کہا کہ ازبکستان پاکستان کی قیادت کو سراہتا ہے اور خطے میں امن و استحکام کے لیے اسلام آباد کی کوششوں کی مکمل حمایت کرتا ہے۔
ان کا کہنا تھا کہ پاکستان کی جانب سے دو ہفتوں کی ابتدائی جنگ بندی کے حصول کے لیے کی جانے والی سفارتی کاوشیں قابلِ ستائش ہیں۔
بختیار سعیدوف نے امید ظاہر کی کہ مسلسل سفارتی روابط اور تعمیری اقدامات خطے سمیت دنیا بھر میں پائیدار امن اور استحکام کے قیام میں مددگار ثابت ہوں گے۔
