ازبکستان کے تاشقند ریجن کے ضلع آہنگاران میں ’ازبکستان–پولینڈ ٹریڈ ہاؤس‘ کا افتتاح کر دیا گیا ہے، جس کا مقصد مقامی مصنوعات کو یورپی منڈیوں تک رسائی فراہم کرنا، نئے تجارتی شراکت دار تلاش کرنا اور دونوں ممالک کے درمیان سرمایہ کاری کے تعاون کو فروغ دینا ہے۔
افتتاحی تقریب میں تاشقند ریجن کے حاکم زوییر مرزایف، پولینڈ کے شہر دروہیچن کے میئر ووجچیخ بورژیم کی قیادت میں پولش وفد، متعلقہ شعبوں کے نمائندوں اور دونوں ممالک کے سرمایہ کاروں اور کاروباری شخصیات نے شرکت کی۔
تقریب میں بتایا گیا کہ ٹریڈ ہاؤس سامان کی ترسیل اور ذخیرہ کرنے کی سہولت کے ساتھ ازبکستان، پولینڈ اور دیگر یورپی ممالک کے درمیان تجارتی اور اقتصادی تعاون بڑھانے کے لیے کاروباری پلیٹ فارم کے طور پر کام کرے گا۔ زوییر مرزایف کے مطابق اس منصوبے سے پولش کمپنیوں کو خطے میں اپنی سرگرمیاں بڑھانے اور مقامی صنعت کاروں کو غیر ملکی منڈیوں تک رسائی کے نئے مواقع ملیں گے۔
2025 میں ازبکستان سے پولینڈ کو برآمدات کی مالیت 11 کروڑ 58 لاکھ ڈالر رہی۔ نئے ٹریڈ ہاؤس میں مصنوعات کی نمائش اور ذخیرہ کرنے، سامان کی ترسیل، نئے کاروباری شراکت دار تلاش کرنے اور درآمدات و برآمدات بڑھانے کے لیے سہولیات فراہم کی جائیں گی۔
افتتاح کے موقع پر ازبک اور پولش کاروباری نمائندوں کے درمیان ملاقاتیں بھی ہوئیں، جن میں مشترکہ سرمایہ کاری منصوبوں، تجارت میں اضافے، برآمدی مصنوعات کی تیاری، سامان کی ترسیل کی سہولیات اور نئے کاروباری روابط قائم کرنے پر تبادلہ خیال کیا گیا۔
