نیو یارک میں اقوامِ متحدہ کی جنرل اسمبلی نے ازبکستان کی پیشکش پر “پائیدار جنگلاتی نظم و نسق کے تحت شجرکاری اور جنگلات کی بحالی کے لیے ایک دہائی کی کارروائی” سے متعلق تاریخی قرارداد منظور کرلی ہے۔
یہ قرارداد دنیا کے مختلف خطوں سے تعلق رکھنے والے 80 سے زائد ممالک کی جانب سے مشترکہ طور پر پیش کی گئی، جن میں وسطی ایشیا کے ممالک، آذربائیجان، روس، برازیل، آسٹریا، جرمنی، فن لینڈ، پرتگال، بھارت، ایران، پاکستان، متحدہ عرب امارات، قطر اور بحرین شامل ہیں۔
قرارداد کی بنیاد ازبک صدر شوکت مرزائیوف کی اہم ماحولیاتی اور پائیدار ترقیاتی تجاویز پر رکھی گئی، جن میں “ماحولیاتی تحفظ اور سبز معیشت کا سال”، قومی منصوبہ “یَشیل مکان”، اور “گرین بیلٹ آف سنٹرل ایشیا” جیسے اقدامات شامل ہیں۔
اس دستاویز کے مطابق 2027 سے 2036 تک کا عرصہ “شجرکاری اور جنگلات کی بحالی کی دہائی” قرار دیا گیا ہے۔ اس کے تحت دنیا بھر کے ممالک اور بین الاقوامی تنظیموں پر زور دیا گیا ہے کہ وہ اس عمل میں وسائل اور کوششوں کو متحرک کریں اور شجرکاری و جنگلات کے تحفظ کے لیے مربوط اور مؤثر اقدامات کو تیز تر کریں۔
یہ قرارداد نہ صرف ازبکستان کی ماحولیاتی قیادت کا عالمی اعتراف ہے بلکہ یہ ماحولیاتی تحفظ کی عالمی کوششوں میں ایک نیا باب بھی ثابت ہو سکتی ہے۔
