اقوام متحدہ کے انسانی حقوق کے سربراہ وولکر ترک نے ایران میں ایک گرلز پرائمری اسکول پر ہونے والے حملے پر شدید ردعمل دیتے ہوئے فوری انصاف کا مطالبہ کیا ہے۔
انہوں نے اقوام متحدہ کی انسانی حقوق کونسل سے خطاب کرتے ہوئے کہا کہ 28 فروری کو ایران کے شہر میناب میں واقع شجرہ طیّبہ پرائمری اسکول پر بمباری نے ‘شدید خوف اور ہولناکی’ کو جنم دیا۔ اس حملے میں 170 سے زائد افراد جاں بحق ہوئے، جن میں اکثریت طالبات کی تھی۔
وولکر ترک نے کہا کہ اس حملے کے ذمہ داروں پر لازم ہے کہ وہ اس واقعے کی فوری، غیر جانبدارانہ، شفاف اور مکمل تحقیقات کریں۔
انہوں نے مزید کہا کہ امریکی حکام کے مطابق اس حملے کی تحقیقات جاری ہیں، تاہم یہ عمل جلد از جلد مکمل ہونا چاہیے اور اس کے نتائج عوام کے سامنے لائے جائیں۔
انہوں نے زور دیتے ہوئے کہا کہ اس سنگین واقعے میں ہونے والے نقصان پر انصاف فراہم کیا جانا ناگزیر ہے اور متاثرین کے لیے جوابدہی یقینی بنانا ہوگی۔
