متحدہ عرب امارات ایران کے اربوں ڈالر کے اثاثوں کو منجمد کرنے پر غور کر رہا ہے، جو عرب امارات میں موجود ہیں۔وال اسٹریٹ جرنل کی رپورٹ کے مطابق، اس اقدام کا مقصد ایران کی بیرون ملک کرنسی تک رسائی اور عالمی تجارت محدود کرنا ہے۔ خطے میں جاری امریکی اور اسرائیلی فوجی تنازع کے پیشِ نظر یہ فیصلہ کیا گیا ہے۔
رپورٹ کے مطابق، متحدہ عرب امارات کے حکام مختلف اقدامات پر غور کر رہے ہیں، جن میں یو اے ای میں موجود ایسے خفیہ کاروباری اداروں کے اثاثوں کو منجمد کرنا بھی شامل ہے جو تجارت کو چھپانے کے لیے استعمال ہوتے ہیں۔ علاوہ ازیں، مقامی کرنسی ایکسچینجز پر مالی پابندیاں لگانے کے بھی امکانات ہیں، جو غیر رسمی بینکنگ چینلز کے ذریعے رقم باہر بھیجنے میں استعمال ہوتی ہیں۔
رپورٹ میں بتایا گیا ہے کہ اگر متحدہ عرب امارات ایران کی خفیہ مالیاتی سرگرمیوں کے خلاف قدم اٹھاتا ہے تو بنیادی ہدف اسلامی انقلاب پسند گارڈز کے متعلقہ اکاؤنٹس ہوں گے۔مزید برآں، یو اے ای کے پالیسی ساز بحری کارروائی پر بھی غور کر رہے ہیں، جس میں ایرانی جہازوں کو ضبط کرنا شامل ہو سکتا ہے۔
واضح رہے کہ امریکہ اور اسرائیل نے ہفتے کے روز ایران پر مشترکہ فضائی حملے کیے، جس کے جواب میں ایران نے اسرائیل اور خلیج میں موجود امریکی فوجی مراکز کو نشانہ بنایا۔رپورٹ میں کہا گیا ہے کہ یو اے ای کے حکام نے ایران کو ممکنہ اقدامات کی پیشگی وارننگ دی ہے، تاہم یہ واضح نہیں کہ حکومت کب یا کس حد تک کارروائی کرے گی۔
