مری میں برف باری اور جڑواں شہروں راولپنڈی اور اسلام آباد میں بارش کے باعث موسم سرد ہو گیا ہے، جبکہ محکمہ موسمیات نے پیش گوئی کی ہے کہ آئندہ چند روز کے دوران جڑواں شہروں میں درجہ حرارت مزید کم ہونے کا امکان ہے۔
محکمہ موسمیات کے مطابق، مری میں مجموعی طور پر چار انچ برف باری ریکارڈ کی گئی، تاہم جمعہ کے روز موسم صاف ہونے کی توقع ہے۔ اسلام آباد میں سب سے زیادہ بارش سیدپور میں 27 ملی میٹر ریکارڈ کی گئی ہے۔
گزشتہ دو روز کے دوران جڑواں شہروں میں درجہ حرارت چھ ڈگری سینٹی گریڈ تک رہا۔ محکمہ موسمیات کے مطابق، راولپنڈی اور اسلام آباد میں سردی کی لہر مزید شدت اختیار کر سکتی ہے۔ ملک کے بیشتر حصوں پر براعظمی ہوائیں غالب ہیں، جبکہ مغربی ہوا کا ایک سلسلہ کشمیر اور ملحقہ علاقوں کو متاثر کرتے ہوئے مشرق کی جانب بڑھ رہا ہے۔
محکمہ موسمیات نے پیش گوئی کی ہے کہ ملک کے بیشتر حصوں میں موسم سرد اور خشک رہے گا، جبکہ بالائی پہاڑی علاقوں میں صبح اور رات کے اوقات میں شدید سردی پڑنے کا امکان ہے۔ پنجاب کے میدانی علاقوں، خیبر پختونخوا اور بالائی سندھ میں صبح اور رات کے اوقات کے دوران ہلکی سے گہری دھند چھائے رہنے کی بھی توقع ظاہر کی گئی ہے
