بالی وڈ کے بادشاہ شاہ رخ خان نے پہلی بار ارب پتیوں کے کلب میں جگہ بنا لی ہے۔ ہورن انڈیا رچ لسٹ 2025 کے مطابق 59 سالہ اداکار کی مجموئی دولت کا تخمینہ ایک اعشاریہ چار ارب ڈالر لگایا گیا ہے، جس کے بعد وہ دنیا کے ان چند فنکاروں میں شامل ہوگئے ہیں جن کی دولت اربوں میں ہے۔
شاہ رخ خان، جنہیں فلمی دنیا میں کنگ آف رومانس کہا جاتا ہے، نے تین دہائیوں کے سفر میں نہ صرف شاندار اداکاری سے مقبولیت حاصل کی بلکہ بطور پروڈیوسر اور کاروباری شخصیت بھی اپنی پہچان بنائی۔
ان کی دولت میں سب سے بڑا حصہ پروڈکشن ہاؤس ریڈ چلیز انٹرٹینمنٹ اور آئی پی ایل کی ٹیم کولکتہ نائٹ رائیڈرز کی ملکیت کا ہے، جبکہ فلموں، اشتہارات اور دنیا بھر میں رئیل اسٹیٹ سرمایہ کاری سے بھی وہ بھاری آمدنی حاصل کرتے ہیں۔
یہ فہرست بھارت میں بدلتی ہوئی معیشت کی عکاسی کرتی ہے، جہاں اب کھیل، تفریح اور میڈیا جیسے شعبے بھی بڑے پیمانے پر دولت کمانے کا ذریعہ بن گئے ہیں۔
اس فہرست میں دیگر بالی وڈ شخصیات جیسے جوہی چاولہ، ہریتھک روشن، کرن جوہر اور امیتابھ بچن بھی شامل ہیں، تاہم ان کی دولت شاہ رخ خان سے کم ہے۔
ماہرین کے مطابق شاہ رخ خان کی ارب پتی حیثیت صرف ان کی کامیابی نہیں بلکہ اس بات کی علامت بھی ہے کہ بھارت کی معیشت میں نئے شعبے اب طاقت کے مراکز بن رہے ہیں۔
