صوبہ پنجاب کی وزیرِ اطلاعات عظمیٰ بخاری کا کہنا ہے کہ کالعدم جماعت تحریکِ لبیک پاکستان (ٹی ایل پی) کے 31 افراد پر مقدمات درج کیے گئے ہیں جن پر سوشل میڈیا پر اشتعال انگیز گفتگو کرنے، دھمکیاں دینے اور قتل کے فتوے جاری کرنے کا الزام ہے۔
لاہور میں ایک پریس کانفرنس سے خطاب کرتے ہوئے صوبائی وزیرِ اطلاعات نے مزید بتایا کہ ٹی ایل پی کے 92 ڈیجیٹل بینک اکاؤنٹس کو بھی بند کر دیا گیا ہے۔ اس کے علاوہ، کالعدم جماعت کی مالی معاونت کرنے والے 90 فنانسرز کے خلاف بھی مقدمات درج کیے گئے ہیں، جن میں سے بہت سے افراد کو حراست میں بھی لے لیا گیا ہے۔
عظمیٰ بخاری کا کہنا تھا کہ لاہور میں ٹی ایل پی کے احتجاج میں شریک 830 افراد کو گرفتار کیا گیا ہے۔ ان میں سے 225 کو باقاعدہ طور پر جیو فینسنگ کی مدد سے گرفتار کیا گیا ہے، جس سے یہ یقینی بنایا گیا کہ حراست میں لیے جانے والے یہ افراد پُرتشدد احتجاج کے مقام پر موجود تھے۔
پنجاب کی صوبائی وزیرِ اطلاعات نے یہ بھی بتایا کہ اب تک صوبے میں 73 ہزار مساجد کو جیو ٹیگ کیا جا چکا ہے اور 50 ہزار سے زیادہ آئمہ کرام نے خود کو رجسٹر کروا لیا ہے۔ ان کا کہنا تھا کہ جن آئمہ کرام نے خود کو رجسٹر کروایا ہے، انہوں نے یہ رضاکارانہ طور پر کیا ہے اور انہیں انتظامیہ کی جانب سے کسی قسم کی زبردستی کا سامنا نہیں کرنا پڑا ہے۔ انہوں نے مزید بتایا کہ اب تک صوبہ پنجاب کی تقریبا84 فیصد مساجد کے علماء نے اپنے آپ کو رجسٹر کروا لیا ہے
