پاکستان کرکٹ بورڈ نے آسٹریلیا کے خلاف تین میچوں پر مشتمل ٹی ٹوئنٹی انٹرنیشنل سیریز کے شیڈول کی باضابطہ تصدیق کر دی ہے، جو آئی سی سی مینز ٹی ٹوئنٹی ورلڈ کپ 2026 سے قبل دونوں ٹیموں کے لیے ایک اہم تیاری سمجھی جا رہی ہے۔ یہ سیریز لاہور کے تاریخی قذافی اسٹیڈیم میں کھیلی جائے گی، جہاں شائقین کو اعلیٰ معیار کے مقابلے دیکھنے کا موقع ملے گا۔
سیریز کے تینوں میچز 29 اور 31 جنوری جبکہ یکم فروری 2026 کو کھیلے جائیں گے۔ آسٹریلوی ٹیم 28 جنوری کو لاہور پہنچے گی، تاکہ مقامی حالات سے ہم آہنگ ہو کر ورلڈ کپ سے قبل اپنی تیاریوں کو حتمی شکل دے سکے۔ دونوں ٹیمیں اس سیریز کو اپنے کمبی نیشنز آزمانے اور خامیوں کو دور کرنے کے لیے استعمال کریں گی۔
اس وقت دونوں ٹیمیں چند اہم کھلاڑیوں کی انجریز سے بھی نبرد آزما ہیں۔ آسٹریلیا کے جاش ہیزل ووڈ، پیٹ کمنز اور ٹِم ڈیوڈ انجری سے واپسی کے مرحلے میں ہیں، جبکہ پاکستان کے فاسٹ بولر شاہین شاہ آفریدی بھی بگ بیش لیگ کے دوران انجری کا شکار ہو کر فی الحال ٹیم سے باہر ہیں۔
ٹی ٹوئنٹی ورلڈ کپ 2026 کا آغاز 7 فروری سے بھارت اور سری لنکا میں ہوگا، جس میں 20 ٹیمیں حصہ لیں گی۔ پاکستان کو گروپ اے میں شامل کیا گیا ہے اور وہ اپنے میچز سری لنکا میں کھیلے گا، جبکہ آسٹریلیا گروپ بی کا حصہ ہوگا۔ اس تناظر میں یہ سیریز دونوں ٹیموں کے لیے نہایت اہم تصور کی جا رہی ہے۔
پی سی بی کے چیف آپریٹنگ آفیسر سمیر احمد سید نے آسٹریلوی ٹیم کا خیر مقدم کرتے ہوئے کہا کہ یہ سیریز پاکستانی کرکٹ شائقین کے لیے سال کا شاندار آغاز ثابت ہوگی۔ ان کا کہنا تھا کہ شائقین بڑی تعداد میں اسٹیڈیم آ کر دونوں ٹیموں کی حوصلہ افزائی کریں اور ورلڈ کپ سے قبل کرکٹ کے اس بڑے مقابلے سے لطف اندوز ہوں۔
