فیلڈ مارشل سید عاصم منیر سے مصر کے وزیرِ خارجہ ڈاکٹر بدر احمد محمد عبدالعاطی نے اہم ملاقات کی، جس میں پاکستان اور مصر کے دیرینہ برادرانہ تعلقات اور مشترکہ تعاون کے مختلف پہلوؤں پر تفصیلی گفتگو ہوئی۔
پاک فوج کے شعبۂ تعلقاتِ عامہ (آئی ایس پی آر) کے مطابق ملاقات کے دوران دونوں ممالک کے درمیان دفاعی تعلقات، عسکری تعاون، تربیتی اقدامات اور علاقائی امن و استحکام سے متعلق امور پر کھل کر تبادلہ خیال کیا گیا۔ ملاقات میں موجودہ خطے کی صورتحال اور درپیش چیلنجز کے حوالے سے بھی گہرائی سے گفتگو کی گئی۔
آئی ایس پی آر کے مطابق پاکستان اور مصر نے سیاسی، معاشی اور اسٹریٹجک شعبوں میں شراکت داری کو مزید بڑھانے پر اتفاق کیا ہے۔ دونوں ممالک نے اس عزم کا اظہار کیا کہ دفاع سمیت وسیع تر شعبوں میں ہم آہنگی کو فروغ دیا جائے گا اور دوطرفہ تعلقات کو نئی بلندیوں تک لے جایا جائے گا۔
مصر کے وزیرِ خارجہ نے اس موقع پر مصری قیادت کی جانب سے نیک خواہشات بھی پہنچائیں اور پاکستان کے ساتھ ہر سطح پر تعاون میں اضافے کی خواہش کا اعادہ کیا۔ ان کا کہنا تھا کہ مصر پاکستان کو ایک اہم شراکت دار کے طور پر دیکھتا ہے اور مستقبل میں تعلقات کو مزید مضبوط کرنے کا خواہش مند ہے۔
آئی ایس پی آر کے مطابق فریقین نے اس بات پر بھی زور دیا کہ بدلتی ہوئی علاقائی سیکیورٹی صورتحال میں اعلیٰ سطحی رابطوں کا تسلسل نہایت اہم ہے، تاکہ مشترکہ چیلنجز کا مؤثر طور پر مقابلہ کیا جا سکے اور خطے میں امن و سلامتی کو یقینی بنایا جائے
