ایک نئی طبی تحقیق میں یہ بات سامنے آئی ہے کہ موٹاپا الزائمر کی بیماری کے پھیلاؤ اور دماغی نقصان کی رفتار کو تیز کرسکتا ہے۔
ریڈیالوجیکل سوسائٹی آف نارتھ امریکا کی شکاگو میں ہونے والی سالانہ میٹنگ میں اس تحقیق کے نتائج پیش کیے گئے۔ تحقیق کے مطابق الزائمر سے منسلک خون کے اہم بائیو مارکر موٹاپے کے شکار افراد میں عام افراد کے مقابلے میں تقریباً دو گنا تیزی سے بڑھتے ہیں۔
واشنگٹن یونیورسٹی اسکول آف میڈیسن، سینٹ لوئس کے سینئر محقق ڈاکٹر سائرس راجی نے کہا کہ یہ پہلی بار ہے جب موٹاپے اور الزائمر کے درمیان تعلق بائیو مارکرز کی بنیاد پر اتنی واضح شکل میں دیکھا گیا ہے۔ تحقیق میں الزائمر امیجنگ پروجیکٹ کے 400 سے زائد افراد کو پانچ سال تک فالو کیا گیا۔
محققین نے مشاہدہ کیا کہ موٹاپے کے شکار افراد میں اہم بائیو مارکرز جیسے کہ تاؤ پروٹین، نیورو فلامینٹ لائٹ (NFL) چین اور گلائی ایل فبریلیری ایسڈک پروٹین عام افراد کے مقابلے میں کہیں زیادہ تیزی سے بڑھتے ہیں۔ تاؤ پروٹین کی سطح میں اضافہ 95 فیصد تیزی سے ہوا جبکہ NFL کی سطح میں 24 فیصد اضافہ ریکارڈ کیا گیا۔
مزید تحقیق سے یہ بات سامنے آئی کہ خون کے ٹیسٹ موٹاپے سے جڑے الزائمر کے بدلاؤ کو بہتر طریقے سے شناخت کرنے میں مددگار ثابت ہو سکتے ہیں، اور یہ مستقبل میں بیماری کی مانیٹرنگ کے لیے اہم پیشرفت قرار دی جا رہی ہے
