امریکی وزیر خارجہ مارکو روبیو نے کہا ہے کہ اگر ضرورت پیش آئی تو امریکہ دوسرے ممالک میں موجود جرائم پیشہ گروہوں کو بھی ’تباہ‘ کرنے کے لیے کارروائی کرے گا اور اس مقصد کے لیے متعلقہ ممالک کی مدد بھی حاصل کی جا سکتی ہے۔
ایکواڈور کے دورے کے دوران گفتگو کرتے ہوئے انہوں نے دیگر ممالک پر زور دیا کہ وہ امریکہ کے ساتھ تعاون کریں تاکہ ایسے گروہوں کا خاتمہ کیا جا سکے۔ اس موقع پر امریکی وزیر خارجہ نے ایکواڈور کے دو بڑے جرائم پیشہ گینگز پر پابندیاں عائد کرنے کا اعلان بھی کیا۔
یہ بیان ایسے وقت میں سامنے آیا ہے جب منگل کے روز امریکی فورسز نے بحیرہ کیریبئن میں ایک کشتی کو نشانہ بنایا تھا، جس میں منشیات سمگل کرنے والے 11 افراد ہلاک ہوئے۔ وائٹ ہاؤس کے مطابق، ان افراد کی شناخت ظاہر نہیں کی گئی۔ قانونی ماہرین نے اس کارروائی پر تنقید کرتے ہوئے کہا ہے کہ اس سے بین الاقوامی انسانی حقوق اور سمندری قوانین کی خلاف ورزی ہو سکتی ہے۔
ادھر امریکی محکمہ دفاع نے الزام لگایا ہے کہ جمعرات کی شب وینزویلا کے دو فوجی طیارے ایک امریکی جہاز کے قریب پرواز کر رہے تھے۔ پینٹاگون نے اس اقدام کو اشتعال انگیز قرار دیتے ہوئے کہا کہ یہ ہماری انسدادِ دہشت گردی کارروائیوں میں مداخلت کی کوشش تھی۔ وینزویلا نے تاحال اس الزام پر کوئی ردِعمل نہیں دیا۔
