فرانسیسی صدر ایمانوئل میکرون نے چین کے صدر شی جن پنگ سے بیجنگ میں اہم ملاقات کی، جس میں یوکرین جنگ، عالمی سیاسی صورتحال اور دونوں ممالک کے دوطرفہ تعلقات پر تفصیلی تبادلہ خیال کیا گیا۔ میکرون اور ان کی اہلیہ کو گریٹ ہال آف دی پیپل میں سرکاری پروٹوکول کے تحت خصوصی استقبال دیا گیا، جہاں سرد موسم کی وجہ سے استقبالیہ تقریب کو اندرونِ عمارت منتقل کر دیا گیا تھا۔
چینی صدر شی جن پنگ نے گفتگو کے دوران کہا کہ چین فرانس کے ساتھ اپنے جامع اسٹریٹجک تعلقات کو مزید مضبوط بنانے کا خواہاں ہے اور کسی بھی قسم کی غیر ضروری مداخلت کے خاتمے کے لیے مل کر کام کرنے کے لیے تیار ہے۔ انہوں نے دوطرفہ تعلقات کو مستقبل میں مزید گہرائی دینے کی خواہش کا اظہار بھی کیا۔
ملاقات میں فرانسیسی صدر ایمانوئل میکرون نے کہا کہ چین یوکرین میں جنگ بندی کے لیے فیصلہ کن کردار ادا کر سکتا ہے۔ ان کا کہنا تھا کہ فرانس اور چین کے درمیان اختلافات ضرور ہوتے ہیں لیکن عالمی سطح پر امن اور استحکام کے بڑے مقصد کے لیے ان اختلافات کو کم کرنا دونوں ممالک کی مشترکہ ذمہ داری ہے۔
خبر ایجنسی کے مطابق میکرون گزشتہ روز اپنے سرکاری دورے پر چین پہنچے تھے، جس کا محور دونوں ملکوں کے سیاسی و اقتصادی تعاون کو فروغ دینا اور یوکرین جنگ کے حوالے سے سفارتی پیش رفت پر گفتگو کرنا ہے۔
