عالمی فضائی معیار کی نگرانی کرنے والے ادارے ‘آئی کیو ایئر’کے تازہ اعداد و شمار کے مطابق، پاکستان کے صوبہ پنجاب کا شہر لاہور ایک بار پھر دنیا کا سب سے زیادہ آلودہ شہر قرار پایا ہے، جہاں ہوا کے معیار کو انتہائی خطرناک سطح پر بتایا گیا ہے۔
گزشتہ چند برسوں سے فضائی آلودگی پاکستان کے لیے ایک سنگین صحت اور ماحولیاتی مسئلہ بن چکی ہے۔ ملک کے کئی شہر، خصوصا لاہور، سردیوں کے موسم میں شدید اسموگ کا سامنا کرتے ہیں۔ ماہرین کے مطابق، اس کی بڑی وجوہات صنعتی دھواں، گاڑیوں کا بڑھتا ہوا استعمال، فصلوں کی باقیات جلانا اور ہوا کی کم حرکت ہیں۔
بدھ کی صبح آئی کیو ایئر کے لائیو ٹریکر کے مطابق، لاہور دنیا کے آلودہ ترین شہروں کی فہرست میں پہلے نمبر پر رہا، جہاں ایئر کوالٹی انڈیکس 452 ریکارڈ کیا گیا، جو کہ خطرناک حد میں آتا ہے۔ اسی فہرست میں کراچی نویں نمبر پر رہا، جہاں فضائی معیار کا انڈیکس 179 رہا، جسے غیر صحت بخش قرار دیا گیا ہے۔
اس سے ایک روز قبل، منگل کو آئی کیو ایئر نے پاکستان کے لیے ایئر کوالٹی الرٹ جاری کیا تھا، جس میں بتایا گیا تھا کہ بڑے شہروں میں آلودگی کی سطح غیر صحت بخش سے لے کر انتہائی خطرناک تک پہنچ چکی ہے۔ الرٹ میں خبردار کیا گیا تھا کہ یہ صورتحال خاص طور پر بچوں اور بزرگوں کے لیے شدید صحت کے خطرات پیدا کر سکتی ہے۔ اس وقت لاہور میں ایئر کوالٹی انڈیکس 507 تک جا پہنچا تھا، جبکہ کراچی کا انڈیکس 178 ریکارڈ کیا گیا تھا۔
آئی کیو ایئر کی جانب سے شہریوں کو مشورہ دیا گیا ہے کہ وہ غیر ضروری طور پر باہر نکلنے سے گریز کریں، کھڑکیاں بند رکھیں، باہر جاتے وقت ماسک کا استعمال کریں اور گھروں کے اندر ایئر پیوریفائر استعمال کریں۔
پنجاب حکومت نے لاہور میں اسموگ پر قابو پانے کے لیے مختلف اقدامات کیے ہیں، جن میں پانی کا چھڑکاؤ اور فصلوں کی باقیات جلانے کے خلاف فوری کارروائیاں شامل ہیں
