جنوبی افریقہ کے فاسٹ بولر کگیسو ربادا آسٹریلیا کے خلاف جمعے سے شروع ہونے والے پہلے ٹیسٹ میچ میں شرکت کر سکتے ہیں، تاہم ان کی دستیابی سے متعلق حتمی فیصلہ میچ سے قبل آخری وقت میں کیا جائے گا۔
برطانوی خبر رساں ادارے رائٹرز کے مطابق ربادا جون میں ٹریننگ کے دوران ہیم اسٹرنگ انجری کا شکار ہوئے تھے، جس کے باعث آسٹریلیا کے خلاف ٹیسٹ سیریز میں ان کی شرکت پر شکوک موجود تھے۔ تاہم انھوں نے اتوار اور پیر کو ڈربن میں کھیلے گئے دو روزہ انٹرا اسکواڈ میچ میں حصہ لیا اور بولنگ بھی کی۔
جنوبی افریقہ کے بیٹنگ کوچ ایشویل پرنس نے کہا کہ ربادا نے انٹرا اسکواڈ میچ میں بہت اچھی بولنگ کی اور وہ آئندہ چند روز ٹیم کے ساتھ ٹریننگ جاری رکھیں گے۔ ان کے مطابق ربادا فوری طور پر سو فیصد فٹ نہیں ہوں گے، لیکن ان کی موجودہ حالت حوصلہ افزا ہے اور ٹیم ان کی شرکت کا فیصلہ زیادہ سے زیادہ دیر سے کرنا چاہتی ہے۔
31 سالہ کگیسو ربادا جنوبی افریقہ کے اہم فاسٹ بولرز میں شامل ہیں اور اب تک ٹیسٹ کرکٹ میں 340 وکٹیں حاصل کر چکے ہیں۔ گزشتہ ماہ 18 رکنی ابتدائی اسکواڈ کے اعلان کے وقت ہیڈ کوچ شکری کونریڈ نے کہا تھا کہ ٹیم ربادا کی فٹنس کے معاملے میں کوئی غیر ضروری خطرہ مول نہیں لے گی۔
ربادا دستیاب نہ ہوئے تو جنوبی افریقہ کے پاس کوربن بوش، جیرالڈ کوئٹزی، مارکو یانسن، اینرک نورکیا اور ڈین پیٹرسن کی صورت میں فاسٹ بولنگ کے دیگر آپشنز موجود ہیں، جبکہ سائمن ہارمر، کیشو مہاراج اور سینوران متھوسامی بھی بطور اسپنرز اسکواڈ کا حصہ ہیں۔
